Thang Thawn Tuang tangthu

Pianna

Thang Thawn Tuang Guite pen Tonzang gam huam Tuimang khua ah 7 June 1984 kumin suak hi. A pa Nang Za Kam, anu Zen Khan Go Suante beh sung panin Ta 14 lak ah amah pen a upan a 9 na hia, ama nuai ah sanggam pasal 5 om hi. Tu laitak sanggam Pasal 7 leh Numei 4 damlai uh aa, Tuimang khua ah sanggam 3 om in, Malaysia ah 2 omin, USA ah 6 aom laitak uhhi. A nu leh pa tawh USA ah teeng hi. UPC Zion Tuimang Pawlpi kemsia Rev. Tun Lian Kam in August 28, 1997 kumin Tuimang Teutuak lui ah Zeisu mintawh Tuiphum hi. Tu laitak in a innkuan un Zomi Pentecostal Church Nashville TN USA ah om uhi.

Pilna zonna

Tanlang pan Tan 8 ciang Tuimang khua ah,

Tan 9 Tonzang ah,

Tan 10 Kalaymyo ah,

India Bangalore ah 2004-2006 sungteng pan Lai Siangtho sangkah in, Computer zong sinin om hi. Blogging ki panin Facebook aki limzat ma, Zomite ki thuzakna Groups ahi Zonet leh a tuamtuam ah 2004 panin Zomi Angvaan cihtawh laigelh ki panin, tuate koihna dingin hih Blogger abawl ahihi. Mun tuamtuam panin Logo Design, Web Design, Business Card Design...cih bang Designer lam sem kawikawi hi.

Zi neihna

Tuimang khua ateeng Pa Dal Khan Thang leh Nu Luan Ngaih Dim te tanu upen Cing Nuam Ngai tawh 3 August 2008 kumin Tuimang Zion UPC Biakinn ah Rev. Go Deih Thang in Pumkhat Suahna neihsak hi. Azi Cing Nuam Ngai pen August 2, 2008 in Zion UPC Tuimang Pawlpi kemsia Rev. Go Deih Thang in Zeisu mintawh Tuiphum hi.

Tu-in Pasian in

Tg.Michael Kam Kham,

Lia Go Liim Nuam,

Tg. Thang Deih Kap,

Lia Dim Lun Siam cih bang Tapa 2 leh Tanu 2 pia in, Nashville, Tennesse USA ah teeng uhhi.

USA ah khuasakna

Anu pa un 26 December 2009 in New Delhi pan Malaysia tungin, Malaysia ah kum 2 val deuh a om khit uh ciangin, 17 May 2011 in USA tung uhhi.

UN Case worker te nasep zonsakna Tysonfood Inc, Goodlettsville ah kum 4 val deuh na sem hi. 2011-2015

2015-2016 sung Nissan mawtaw bawlna Company ah semin,

28 April 2017 Hissho Sushi Franchise sem, a sep kawm mah in, April 9, 2018 in Personal Business ci-in Japan Ansai T3 Sushi bar ci in, Nashville Downtown sungah 20 September 2018 ni-in hong hi.

May 10, 2019 in a nupa un US Citizen laidalpi ngah uh hi. A tapa upen Michael in March 6, 2020 in US Citizen laidalpi ngah hi. A nau tengpen USA ah suak in USA gammi hipah hi. Michael ahihleh July 30, 2022 in ZPC Pawlpi kemsia Rev. Michael Lian in Zeisu mintawh Tuiphum hi.

Hissho Sushi panin 21 September 2018 Uber leh 27 September 2018 Lyft hawl ki panin in, tua kawmkawm in Nashville Area sungah Sushi van aki tangsam te tungah Sushi van zuak kawmin Covid-19 hong om ciangin, 2020 March kha in Lockdown ahih manin, mawtaw hawl khawl in Sushi van zuak semsem lai aa, Covid-19 Lockdown khit 15 July 2020 ciangin, Japan an ahi Sushi sai ci in T3 Sushi Plus sai hong kik leuleu in, tuni tandong a innkuan un semsem lai hi.