Zomi Angvaan

Thang Thawn Tuang Guite, Ka Ngaih Sut Na Pan In

Zomi Angvaan

Latest Post

Ka Nau Hi Ven

Unau nih khuakim ah Vasa bengin ki zui uhhi. A u pen kum 12 gual hi aa, anau pen kum 6 gual khawng ahihi. Vasa zong tawm khat man uhhi. Inn a ciah kal dinguh ngaklah mahmah uhhi.

A ciah madeuh un guahzu ding ki thoi-in huihnung gawp aa, a unau un a innlam uh manawh in nawhtai mahmah uhhi. Guahmal te zong hong khia pianta in huihlah hatsemsem kawm hi. Amau zong Vasa a benguh tuahpha kisa in, inn a tunkal dinguh ngaklah mahmah uhhi. Nawh tai semsem uh aa, hong gimpian uhhi. A khua uhpen khamlak ahih manin to tai vava uhhi.

Anau zong inn a tunkal ding a ngaklah kikal leh a khe hong sui kha in deih bangin tai hat nawnlo  hi. Guahlah tam semsem huihlah hat semsemta ahih manin a u in a nung ah anau pua in taipihzo nawnlo in gimpipi in pua hi. A khuanawl uh panin Papi khat in a muhteh ka inn vuah hong baang un ci-in amau zong baang uhhi. Papi pa in a nau a u in a puak a muhte gimsa lua mahmah ahih manin Papipa in na nau bang hangin pua na hiam cih a dotleh a u pa in, "Amah Ka Nau Hi Ven", ci ziau hi. Anau hehpihna itna tak tawh gim thuak keeikaipi mah in pua hi.

Itna neihten gimpipi haksa sa pipi in ih thuak haksatna te thudon in puakpih nuam hi. Ka u hiven, ka nau hiven cih zah dongin Zomipihte sungah ih cinlohna tampite itna tak tawh ki telsiamzo beek leng bangzah tak in et lawm ding aa, Biakinn ah Khomun leh Lenggahtui i zatte a manh nei hong lak semsem ding hi. Maisakna an leh tui zanghzangh na pi in mite tungah mawhmai sakzawhlohna khawng i neihkha hiam?

A tate hong itna hang mah tawh i mawhna i van gik khempeuh pua khia in Calvary mual tungah Sihna tawh Zeisu in hong zawhpih khinzo hi. Lungdam.

Thawn Tuang
Nashville TN USA
Oct 17,2015

Vaphual omdan nam 3
Zomi Vaphual pen pawl khat in, a tuamtuam in agen omta ahih manin tawm gensuk leng;

1. Ki mai ngat mah hoih ci
( ki mai ngat in, ho lung kum khawm mah hoih ci, pawl khat in ki mai ngatlua liangin, i kim i paam ate thu ki mulo, ki zalo ci)

2. Ih ngatna lam ki bang hoih ci
( I etna lam ki bang pen hoih aci om, i etna lam ki bang aa, ei leh ei i ki muh khakloh zong hoih kei aci om )

3. Ki nung ngat mah hoih ci
( ki nung ngat pen nung leh ma panin hong sim ding omleh zong ki thei, ki mu aci om hi, minam ki bang khat ki nung ngatngat cih hoihlo aci om)

Deih dan, khiat dan ki banglo ciat hi. A hoih lamin a La te'n ahoih lam mah in, mu thei lel hi. Siat lak ciat leng, ahoih omlo hi.

Zomite ki ciamtehna Zomi Vaphual pen ki mai ngat mah No.1 mah kei bangin hoih asa denden ka ahihi. Mailam khangthakte sungah tulai khanglak lawh pawlin, ama thu ki mang keileh Khaicii hoihlo hong tuh nuam tam simsim ta ahih manin, ki dawp huaisa ing. Lungdam.

Thawn Tuang
#T3Zomi
Sept 11, 2019

Thuman Gen
Nam Hih in Genleng

Khatna: hih pa pen a melvom, aha zong mi ahtawh ki banglo sau deuh, asamzong kiil hi.

 Nihna: hih pa pen siamna neih in, a mel muhbek maitai suah in, mai ngap huai, lawm huai tuak hi.

Thuman gen veve pen, mite hehna dingin a gensiam om aa, mite lungkim nang a gensiam om hi.

Thuman ahita teu zongin, mite hehna ding, ki totna ding peuh i gen khakleh Thusia deih ki hi aa, hai hang sanna ahihi.

 Thuman veve ki lemna, lungdamna agente pen thu hoih deih ahihi.

 Thuhoih deihte in, thuman khempeuh pusuah saklo aa, mite muan leh belhtaak dingin, kep bit ding thu na om veve hi. Lungdam.

 Thawn Tuang
#T3Zomi 

Pawlpi upa semsem na pi, a tate biakna mi om theilo bang hang, a seppihte thusimlo, Siampi te zahtaklo hilel.

 Pastor sem na pi, atate bangin Biakna mi hi theilo, a seppih siate, upa te thusimlo, zahtaklo hilel.

Amah biakna mi hi na pi in, atate biakna mi hi theilo bang hang, makai te leh siate zahtaklo in thupi simlo hilel.

Biakna mi hilo, Zuu bang dawngzel, Biakinn khat veivei bek paizel ahih hangin a Tate biakna mi hi sese bang hang? Ama'n zuu adawn hang, biakinn a pai melloh hangin, upa makaite zahtak, Siampi te zahtak in thupisim hilel hi.

Siate thugen zaknopsa kei phialleh ahoihna tengtawh Tate zakin genzel peuhleh Siapa thugen pen tate'n ngaihnop na sa lel ding hi. Upa makaite geelsiamna lamsang Thupi tak ei ci-in a Tate zakin agenteh a Tate'n upa makaite, ei sawl kulloh in na zahtak lel ding uhhi.

Gahhoih leh Gahpha mahmah i suahnop leh ahoihlo lam sang, innkuan sungah zatloh hoihpen hi. Lungdam

 Thawn Tuang #T3Zomi
February 11, 2019

Innkuan sung gina, khangto deuh icihte enleng Pa pen a picing kei phial zongin, a zi le tate'n innkuan lutang in Pa hi cih thei aa, Pa pen a picing, azahtak baang takin a bawl innkuan pen a khangto pah henhan keizongin, kiamlam manawh lo uhhi cihpen mipilte muh khiat ahihi.

Nu penin innkuan sungthu vanzo zaw khamah ding hi. A vanzo zongin, innkuan Pa pen Pa ahihna taituanlo aa, Pa dinmun zo keiteh cihdan tuamtuam tawn innkuan Pa hi na pi, Pa bangin a bawllo a simmawh bawl vatvat innkuan pen a tate mihai a suah pahloh uh hangin, a mailam uh kiamlam a manawh innkuante ahi uhi kici hi.

Pawlpi ; Pawlpi in cingin cingta keileh Siampi in i laksa a ki apsa khat pen Siampi pa a zahtak pawlpi pen khangto hi. Mipi nautang ten Kha khat in E.g; $2500 angahleh Siampi pa in tua nuaizaw a ngahleh pawlpi cidam omlo hipah hi(Ahi zongin pawlpi member phazah inzong saihi). Sawm Ah Khat panin Siampi khasum ki pia ahihi. I piak khit, biakinn ah 1/10 a ki ap khit a ki pan Pasian tungah a ki ap khin hipah hi.

 Siapa thunget hong pai ngei kei, nipi sim aa Pulpit ah thugen bek hi. Vai zong hong vanpih zo taktak kei icih aa, Kha sumvai tawh a vau bawl pawlpi pen Pasianin na gum vetlo hi. Siampi pa in hih theina haulo himahleh pawlpi in i laksa khat ahimanin a ki lawm ciang khat Khasum pia in, a lungkim sak pawlpi pen cidamin, khangto lam manawh hi. Pawlpi mi sung panin na sep hoih, pil tung tuang ki behlap zaw hamtang hi. Tuapen Pastor te sep/seploh hangzong ki tuanlo, Pastor te i lungkimsak manin Pasian zong lungkimin Pawlpi sung cidam khangto zaw hamtang hi.

 Thukhupna; Innkuan sung, Pawlpi sungah Pa bel, Siampite a lungsim uh cidamin khamuang photphot leh innkuan sung, pawlpi sung ki cidamin, ki khamuang aa, khantoh lam manawh zaw hamtang hi cih i tel ding thupi hi. Pilman Haiman, Hauhman Zawnman in Pasian in kuamah tonpih lo hi. Lungsim tawng a en Pasianin ih lungsim tawng panin a pai khia i lampi zuih ding ciat na khung pah hi. Bang lampi hong zuisak leh ih ut hiam?

Thawn Tuang
#T3Zomi
Zomi Angvan
January 28, 2019

Cope Topa leh Pau Cin Hau

Ih munmun panin minam ki vei ciat aa tuteng Zomi Nam group sung Pau Cin Hau lai cih thu hong thang mahmah in kenzong mimal muhna veina ka gennuam hi.

Pau Cin Hau lai cici ding ihih leh Zomibup a huamzo tam ci-ing. Cope Topa lai kici lo aa, Cope Topa'n Zomite adingin Zolai hong bawlsak i ci uh hi. Pau Cin Hau lai ih cihcih pen “Zolai” ci leng adikzaw tam ci-ing. Computer tawh Key Map Font hong bawlna uh ah “Key Map for Pau Cin Hau Fonts”,  kici pen Zolai Fonts ci leng a tangzai zawtam ci kik ing. Cope Topa lai cihleh Cope Topa Fonts kici lo aiteh ka na ci hi. Pau Cin Hau in Zomibup laizat ding hong mu khia ahiam? ama zat bek dingin mu ahiam? A muhna sung thu ka thei cian kei hi. Cope Topa in Zomibup zat dingin hong bawlsak ahih manin Zolai a ci ih hiam. Zolai hong bawlsak mi nih ten Zomibup huam ding hong bawlsak penpen kuazaw hi ding hiam? Tu hunteh Computer tawh thu khat peuhpeuh manlang zaw in puah huai, zuunhuai laimal gawm thu a ki pat mipite'n ih muhna ih veina te olno tak in ki pulak thei-in ki tangko theita hi. Lailam tawh na sem nuamten thu tampi ni khat in zozo uh hi.


Gehtehna: Kham Za Cin leh Cin Sian Thangte in Kawlzang panin Zanglo kai dingin Lawi kaito uh hi. Tua Lawi pen Tuimang khuabup ading hilo ahih manin Kham Za Cin te Lawi cih bangin kisam hi. Tuimang khuabup ading hileh Tuimang Lawi kici ding hi. Zolai pen Pau Cin Hau Lai ih cih pen a hi ding mah hiam? Kei bangin ka telzo nai kei hi. Pau Cin Hau in Lai hong bawlna thute a ki cianin gen leh tangko huai mahmah kha ding hi.

Laipian Lai a ci pawl om leuleu hi. Pau Cin Hau in biakna pawlpi hong pat khia pen Laipian pawlpi hi aa, Lai hong bawl khiat te Laipian Lai a ci ihiam? Laipian pawlpi adin zawhteh Lai hong pan khia maw cihte theinop huaisa ing.

Zomibup huam zat dingin Lai hong bawl khia ahihleh Laipian Lai, Pau Cin Hau Lai cici ding mah ihiam? Zomite adingin Lai hong bawl khia Pau Cin Hau ci-in, a bawl khiat lai pen Zolai ci leng a lemtang zaw diam ci-ing.

Pau Cin Hau hong bawl khiat pen Zolai ih cih thei khit teh a khangtohna ding leh a picin semsem ding ih deihleh ZCLS, ZOLUS, ZOLL.... cihte tawh mapang khoploh hong phamawh dingin lam-en ing. Laipian teng bek in thu hong neih in, amau teng bek in hong hanciam uhleh Zomibup in ki hamciam zolo kha dingin lam-en ing. Kum 2007 hiam khat in hih thu Zomi group te ah ka tangko ngei khin hi. Mizo ten Pau Cin Hau lai hong bawl khiatna hangin komau Lai hi ci-in UN lam-ah gen uh aa, Lai lam tawh kisai hamphatna tamsim ngah uh cih ki gen hi. Zosuan khempeuh ading hi taktak mah ei ih cihleh Pau Cin Hau lai, Laipian lai ih cihcih te ngaihsut huai kha ding hi.

Zogam sang kahna mun-ah ih sinsak ding ahih  leh Pau Cin Hau lai ki sinta hi ci nawnlo in, Pau Cin Hau in Zomi te ading hong bawl khiat Zolai ki sinta hi ci leng hoih in ka lam-en hi.

Hih thute ban-ah minambup ading ahihleh mi masa laipil mipil makai te tawh zong thu leh la ki dotbawl leng hoih sem dingin ngaihsun ing( ki dot bawl kei uhteh cihna hilo hi). Ki pawlna khat bek in minambup ading thulela gelsuk ziauziau mawkleng ki pawlna dangten bang cih ngiahsut ding cih zong khinkhai huai kasa hi. Ih ki pumkhatna ding kei tumtak in ka lunggulhna thu hong sung khia hi-ing.

Thawn Tuang
Zomi Angvaan
Dec 9, 2012

MKRdezign

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget