Nitum Ngeilo Zogam Nuam

Sang a kahna panin sang Siaten a nu leh pa lai akhakna sungah “Na tapa uh hai lua hi.  Ka cih nading uh thei vet kei ung” (Your child is dumb. We can’t do anything for him) cih ahi hi. Hih laikhak a sim laitak un a nu leh pa bang zahtak in a lungsim uh sukha ding hiam? A inn sung uh khuamial pi in a tuam laitak hi kha ding hi.

A nu in zong tua lai thuk kik pah a, “Ka tapa a tel lo hi zaw uh teh. Keima’n lai ka hilh ding hi” (You do not understand my boy. I will teach him myself), ci hi. A tapa sangah lai hailua sangkah thei nawnlo ahih manin a Nu in inn panin Lai hilh tangtang hi. A nu in muanbawl lua ahih manin a nu’ khasiat nading, lungnop loh ding peuhmah ut ngiat lo-in hanciam tentan-a a tawpna ah leitungah Khuamial panin Khua vaksak zahdong a bawl khia masa pen mi khat suak takpi hi.

Sang siate hailua mahmah a cihpa pen Thomas Edision (February 11, 1847 – October 18, 1931) ahihi. Leitung ah a om ngei nai lo na tampi, phonograph, electric bulb, motion picture camera a kipan van nam 1093 te bawl theih nading US patent a nei pa ban-ah Germany, France leh UK gamte ah zong tampi nei lai, ci uh hi.

Sun leh zan in a mabawlsa Mei(Electric) innpi sung khat ah hong denleng Nitum ngeilo a bang hilel mawk hi. Khuamialpi in nawkpi in a nawk khak hangin lungkhia tuanlo in a Nu leh Pa pahtahna nuai panin Khuavak a bawl khiazo mipa Pasian in suak sak zo hi.

Lai lamtawh ki sai-in Leitungbup ah Kawlgam hai pen, tua sungah Chin State haipen, tua sungah Zomite haipen hong ki ci phial mahleh Zogam Tuunnu in hong puah veve aa, Zomite a munmun ah nopsakna khamuanna in a tumngeilo Pasian Kha Siangtho in hong tankhin hi.

Nitum Ngeilo Zogamnuam hong suaksuak hita hi.

Thawn Tuang

Nashville TN USA

Feb 24,2016