Ka Khut Nih Pan In NO.1

Delhi ka om lai, Khen Solomon in laigelh kullo in, kampau ziau leh a computer a laigelhna dingmun ah laimal suaksak thei hi. Ahizongin keizat dingin hileh nuam kasa keizaw aa, ka khutnihtawh laigelh ngiatngiat leng nuam kasa zaw hi. Khutnih tawh laigelh cihpen ngaihsutna taktak tawh laigelh nuamzaw lai hi. Tua manin, “ Ka Khut Nih Pan In,” cihpen “Ka Ngaih Sutna Pan In,” cihzong ka deihna a ki bang ahihi.

Si Tuipi le Galilee Tuipi thu gentehna tuni dongin man lai hi.
Si Tuipi ih cihpen naaknei aa ahizongin a luangkhiatna mun omlo ahih manin bualpi khat suak aa tuisung ganhing khempeuh nungta thei hetlo hi.

Galilee Tuipi ih cihpen naaknei in a lungkhiatna munzong om aa, Tuisung ganhing namkim nungta ahih manin Tuisung gamhing te in nuamsa uh aa cidam uhhi.

Leitung ah ih piankhiatna ahangzong theitel in hih thu nihte etteh khakleng thupi kasa hi. Ih vaihawm theihna khat peuhpeuh ah ih vaihawmna sung mite in nuamsa uhhiam cih ngaihsut huai kasa hi. Pilna sangpipi ihneih pialzongin, hauhna lianpipi ihneih pialzongin ih vaihawmna panin a luangkhiate mite in a ne theih uh hiam? Nuntakpih uh hiam? Cih zong tampi ngaihsut ding thu om kasa hi.

Makai hihna ding munah mite ki phu keei aa, ahizongin nungzui hihna ding mun ah mun awngden hi. Na deih pen telding hilecin nungzui sang' makai ding cih na lunggulh zaw kha maiding hi. Pu Thang Lian Pau genkawmpak leng, “makai dingin kei a phu ka hikei aa, ahizongin makai ding hihna in ka lingko ah hong kikoih hi,” na ci hi. Makai ding teelcing ahihnak leh ki phutkeei zong kisam lo hi. Ki phut keei tawh makai ngahna pen a luangkhia theilo bualpi tawh kibang kasa lel hi.

Lai ih gelh sunsun tamlo na pi mite khasiatna khawng ih gelhkhak ding alau huai hi aa, tuabang nuntakna pen Pasian in deih hetlo ding banah, tomkal sung ihnuntakna sungah a ki manglo thutawh ih buaina pen mite in ih nuntakna hong lunggulh hetlo ding nahi lel tak hi.

Nuntakna siangtho ihcihpen guihtheih khamthei zanghlo te hi masa lo hi. Ei tung, nang tung pan a luangkhia a om sunsunte mite lungkimna ahih dingpen nuntak siangtho na hizaw hi.

Tua ahih manin tomkal sung ihnuntakna sungah ih sep kankan na tampi takpen kumkhat khit ciangin hong thupi nawnlo lel ding ahih manin, tomno sungbek a kimang thute adingin ih nuntakna zangh kei hi. Hun gilo leh hunniin ahih manin na hun neihkhempeuh Pasian lam ah zangh in cihpen amau tungah kaki ngatna leh eite ama tungah ih ki ngatding ka deih hi.

Thawn Tuang
Zomi Angvaan
26.April.2011
http://zomi-angvaan.blogspot.com/