Malaysia Tuun Nu No.2

“Hih ciang tungding kisa zokeng, ka lungsim ka ngaihsut ciang,” cihbangin ih ngaihsut loh ding ka deih hi. Lam-etna leh ngimna lianpipi neihding pen thupi hi. Tuaciang bektawh zong kicing nailo aa Pasian adingin sep aa, nuntak pih ding leh tomno sungbek ki bang nuntakna ih neihloh ding pen ih lungtup laigil hizaw hi.


Zo-zuu leh Zo-an zong Zogam lo ding in Delhi ah kimpen inteh kacih leh Malysia sem ah kicing mahmah cihpen ki mutheih hi. Ih Zo-an te na lengzong gamdang zin kawikawi ta aa, a mite zong mun citeng ah kim semsem ta hi hang. Hih bang na tuakkhak ciangin upmawh thutawh gamdang a tungvat cihbangin na ki ngaihsut kha ngei hiam?


Hong gen taktak ning. Gamdang koi lai, koi mun na tungzongin na pian ma pektham in Pasianin eite omna dingin munna bawl khin hi(Piancil 1:1). Eite ih pianna ding leh ih sih nung ciang adingin Pasian in munleh na te eite ading na gelkholh khin ahihi. A sunga om mihingten ih zatding natampi bawl aa, a thak abawlkhia theilo eite in mite bawl lei ziahziah in tuate zangh ziahziah theih hihang. Ih zangh theihloh na tampi zong ih mit taituam lai hi.


Ka lungdampih theih mahmah thubawlkhat pen Pasian in lam-etna leh ngimna a piak te a tangtungsak te ahi Motor neih, innneih, laisimna zo, maban zoto cih bangte lungdampih tak mahmah hi. Pasian in ngimna neihding leh lam-etna neihding aa hong bawl ahih manin tuate a tangtungsak ding ei mihing te ih hihi.


Malysia panin gamdang tung tampi tak om aa, innhoih leh motor hoih nono zong tampitak mah in neihto aa, pilna asinto tenzong Zogam bek ah gualzawhna ngahlo in aom na peuhpeuh vuah thupha na sangto zel uh ahih manin Pasian lungdeih kicingna a tangtungsak ih hihlam ih pawkbeh manin ih lungdam semsem lai hi.


Zomite gamdangtung masa, Pilna ngah masa, masa cihlam peuhmah pen, Dawi Ha Vang Kawmkal pan Pasian in hih ciang hong laamto hi cih ih gentheih mahmah hi. A taktak in Pasian thu a zuiding aa piang masa ih hi aa, Leitung ih nuntakna sungah Dawi nasepna hong khanglian in Dawi nasepna sungpan ih suahtakteh a patsatna pen Dawi sungpan tawh kibang kasa zel hi.


Zomite' sungah patsatna manlo tampi omkha ding hihang. Nang khempeuh, a piang khempeuh patsakna na telnopleh Pasian pan napat kei leh na telzo kei ding hi. Suahna, Gupna ngah cihbangte zong ih nuntak sung tawmvei Dawi hong hetcimna sungah aom khapak bek ki hi aa, a taktak tuabang nengneng zong Pasian vaihawmna leh gelna vive mah na hihi.


Thawn Tuang
Zomi Angvaan
11.4.2011