Malaysia Tuun Nu No.3

Hun khat lai-in a thangthu, “ Sen An ne dingin, Japan zi neihding, USA ah teng ding”, cihthu ka ngaihsut leh piang theih kasa hetkei hi.


Sen An kalkhat sung bekbek nesin dih vevua khatvei nek in, namdang an ahih na tawh, ih lawp nekpong hangin piangtheih taktak lo hi. Sen An pen a gensiam ten cidamna lam tawh kituak cise uh hi. A gensiamlo tenbel thagui natna tampi piangsak cihpeuh gen zel uh hi.


Zo An pen Zogam bek ah omlo aa gam khempeuh ah na om hi. Zo an kacihteh Zomi Tuunnu te khuttawh huankhempeuh Zo an ka ci hi. Namdang an tampi kanek loh hangin ka nek sunsun pen Zomi Tuunnu ten an hong huantaktak bel ki phawk kik mahmah hi. Ih khantawn adingin Zo an mah lungkimna om sa pen ing.


Japan zi neihding tawh kisai tampi theihet kengin, Janpan Zinling nasia lua mahmah aa, mitampi si leh nekding dawnding haksat hun ahih manin Japan zi ka neihkhakloh kamsia ka sa hetkei hi. Ahizongin Japan aa Zomite leh mihing nuntakna aneih khempeuh dahpihna ka neih vilvel hi.


Zomi zi ka neihpen hampha ka kisakna tampi om hi. Zomi zi ka neihmanin ka sanggam te, na nu le pa te tawh limtak in ki-itna thu kiza theih, Zo an huan siam mahmah ahih manin Zomi zi kaneihpen Pasianin kei ah dingin tupna leh lam-etna kaneih hong tangtungsak na hi gige hi. Zo an huan siamlo zipen Zomi sungah tampi omkha mah ni.


A taktak in Zomite' sungah ki-it taktak a dim aha in Pasian in kicing takin hong koihsak a hihlam ka tel hi. Tangval lai-in sungh le pu zong ngaihsut ding thupi ahih na kong gennuam hi. Na sungh na pu te namdang mi hileh Zomi te tawh a ki polh theih diam? Na sanggamte leh na nu le pa ten ka zi hong hopihsak keihen, hong itsak kei hen na cihleh namdang zi na neih kulpah ding hi. A hizongin namdang zineih pen Zomi taisan leh itlo cihna hilo aa tanau sungah itna taktak ki dim theihlo cih hibek hi.


USA ah teng ding icih zong tuapen huntawpna hizenzenlo hi. Lungdeih kicinna zong hipah lo hi. Na it na ngaihteng khempeuh kimpah ding cihna hilo aa, khuasakna nuamtuam ding tate adingin nuntakna vainuam tuamding cihna hi aa, ih zatkhial khak leh Taten nu le pa ciangbek hong theihding aa, hunpai to lai leh ki hingmang ding cihzong phawk huai hi. Tualeh bangteng kisam hiam? Ih nuntakna hong piangsak Pasian Thu limtakin na hilhzawh leh nuntakna kicing na neihtheih pan ding aa, Zomi ihhihna Pasian hong piak Nammin zong hong phawkding uh aa, minam mang ki hilo ding hi.


Zogam pen haksa, gentheih ih cihcih hangin Pasian in it leh ngaihteng libang cina dingin Zogam na bawl sese hi. Tuapen Zomite' ading bek hi aa, minam dangte in nuamsa lo, nuamsa cihzong ih theih khakloh hangin Zomite' nopsak ding pen thupi hi. Tuabang nuntak zia pen Pasian in minam neihding aa hong bawl ahih manin Pasian lungdeih kicinna na hi gige hi. Pasian in na lungkham detding hong deihlo aa, a ma adingin nuamsa leh nunta dingin hong deih ahihi.

Ih omna khempeuh ah Malaysia Tuunnu ka cih mah bangin na omom na gam ah Zomi Tuun Nu aneih na hihlam pawk den in.


Thawn Tuang
Zomi Angvaan
https://zomi-angvaan.blogspot.com
Hih sungah sim aa, nuntakpih theihding thubek kikoih citciat hi.