Malaysia - America

"Leitung pen a bem hi," cih Christoper Columbus(1446-1506) in hong theikhia aa tuni dongin leitungpen abem hi cihthu mikim in ih thei hi. Khuahun le ni te gam khat leh khat ki lamdang, ki bang hetlo ahih manin kenzong lamdang kasak thu leh ka tuakkhak thu ka gennuam hi.

Malaysia panin May 18, 2011, am9:15 in USA lamzuanin ko innkuanun leh UN mi pawlkhat ka pai uh aa, HongKong Airport ka tun uhteh online a free in kingah zihzeh ahih manin hun ngah kisa in keizong tawmkhat ka tu hi. Zomi online groups sungah Zomidaily.com inzong hong puakpah in a kua maciat in thu nong ngetsakna hangun hong ki vaihawm sakna mun cidam in tung theih ka hih manin ka lungdamna zomibup tungleh zomidaily.com tung mahmah ahzong lungdam ka ko hi.

Hong Kong Airport panin May 18.2011 pm 4:25(Hongkongtime) in Cathy Pacific Airbus ka zui uhaa, Vantung le Leitang kikal ah zankhat ka zangh uh aa, ahizongin ani pen ki sim kha lotawh kibang hi. Los Angleles, Califonia USA Airport May 18.2011 pm 4:30(LA time) ka tung leuleu uh hi. USA Homeland Security ten Agency pa kiangah hih mite bang dan hiam cih a dotleh Agency pa in, hih mite Majority World hi acihbek zum nasemte in hong telsiam, hong sangtheipah in mavang hanhan hi. Tua panin USA mite in hehpihna neihtaktak uh hicih ka muhpatna na hi kikta hi.

Los Angeles ka tun uh ciangin Motel6 Hotel ah zankhat ka giak uh hi. Zingsang ka thawh ciangin May 19.2011 nimah na hikik leuleu hi. Leuleu ka cihteh Zankhat pen Vantung le Leitang kikal ah zangh hi na pi in tuani leh Hotel ah ka giakni zan uh ka ngaihsut ciangin Leitungah zankhat a vel in zanghkha kaive maw cih ka phawk hi. Leitung pen alamdang pikhat aive cih ka ngaihsun hi.

Zolai simbu sungah Leitungpen abem ahihi cih ihsin khak thu ka ngaihsut ciangin abem a cihcih uh hih bang danhang aive maw cih ka ngaihsun theikik hi. Leitung abem manleh khuahun ki heidan kilangdang aa, tuazui in mihing belpuak ziazong ki dang, kibanglo aive maw cih ka ngaihsun kik hi. Melpuak zia zong a thupi mahmah khat ahihi. Melpuakzia pen leitungah ih kibatpih kuamah omlo aa a tuam vilvel in Pasian in mihingte hong bawlhi. Ka tapa Michael Kam Kham in puteek biangmul hau mahmah khat mu aa, Osama Bin Laden melpuak ziate dan ee, laupian mahmah in amuhna panin keikiang lam hong tai hi. Melpuak zia hangin USA atung thei ka hihi cih a gennuam ka hihi. Zomite melpuak zia neihlo hileng tuni dongin ka omna ki theihetlo ding hi.


Los Angeles airport panin May 19.2011 am:12:25 hunin Memphis, TN zuanin ka lengkhia leuleu uhhi. Memphis airport 6:45am in ka tung uh hi. Memphis airport panin 7:45 hunin Columbia airport 9:4pm ka tung uh aa, UN lamte pawlkhat leh zomipih ahi Tangval Tuang ( khuadamkhua) ka khua vengpa na hi sawnsawn ahih manin ka lung na dampeuh mah hi. Ka omna dinguh Missouri, Columbia USA ka tun uh ciangin innveng pan Pa Dal te innkuan, Nu Nuam, Lawm Tuangte hong paitheih Zomi pawlkhat hong pai uh aa, lungdamkoh thungetna hong neih uh ahih manin ka lungdamna lian mahmah hi.

A zing ciangin ko om na inntawh ki nai Zomi akua maciat hong pai uh ahih manin Zomite' ki it leh ngaihzia te thupi taktak kasa hi. Pasian deih lampi atawn Zomite ki hihi.

USA cidam in hong tungsak Pasian tungleh akua maciat tungah lungdam ka ko hi.

Huntawmno sung khattawh...,

Thawn Tuang
Zomi Angvaan