Pate' Thupha

Pate' Ni a ki pat in abulphuh uh ahi, "Note tung a hong kibawl ding na deih bangun, midangte tungah na bawl un", cih a hihi. Hih thupen hoih ka sa thawntuangmahmah hi. Mite tungah utut in gamtat, kampau ngam huailo lua hi. A diktat zo ih omloh hangin a siangtho ding ki ngahthei lua hi.

Pate' hang bekbek in mite ki picing thei pan bek hi. Khanggui leh innkuan sung hoihpai theihbek hi. Bang hang hiamcihleh khangluite in Pa ki telmello ta te pen, "Bil vuhloh ta", cih na gen sese uhhi. Hih thu ih ngaihsut ciangin bangzah ta in ih Pa te a haiphial zongin Pa neih manin bilvuhloh ta ki ci theilo hi. Ahizongin Bilvuhloh ta bang' aa hong kici leh nu le pa neilo hilhding neihlo a vakvai mite tawh kibang cihna ahih manin kamhoih hetlo na hihi. Tu hun ciangin bilvuhlo ta cih tangtang ding atamloh hangin ki pawlna sungah thutangpek nuam, thuhoih kigenleh ahoihlam in la thei mahmah lo ki tam ahih manin tuate zong, "Bil vuhloh ta" ki ci theih dingin ka lam-en hi. Kei ngaihsutna ah maw...


Pate' hang aa Thupha ih ngahna ih ngaihsun kha ngei hiam? Pa na ngaihsut leh Nu zong a phawk na hi aa, Nu na ngaihsut ciangin Pa zong a phawk na hipah hi. Hihte nihpen ei a tate in a sehsuah nuam kitam mawkmawk hi. A haivai penpen ah khat ahihi. Ta te zahin Pa te pilzo taktak lo ki tamta cih lungsim ki vom simsim mawk hi. Ahangbel tamgen dahni in, ahangpi khat ah Pasian hong piak thupha a sut, a pulak ih tamzo nawn kei hi. Thupha ih ngahna a naak ih manggilh baih mahmah hi. Ka pa in ta 12 hong neih aa tuni dongin Tuimang Khua ah hong dampih lai aa, mau tungah na lianpi ka vaihawm sakzwhloh hangin a ma thupha hong piakna hangin mite tennopna gam ah a tung ka hih manin ka tuun le zua ka phawkna hang agengen nuam ka hihi.

Pa' ten bangmah hong piakzawh loh, hong et kholhzawh loh uh hangin nekding hong kisamsak ngeilo aa, amau nekding tanghial a tate hong pia in amau a gilvah hong ki neih uh hilai hi. Gamdang hong thanciangin ih nulepa in ih maban ding sunlezan in hong lungkhampih den cih ih phawk kha nawn kei hi. Lungkham cihtak ciangin a tate haitat gawp cih hisam lo aa, ih kalsuan zia ding ahoihlam vive ngaihsun in lungsim tampi tawh na ihmu theih taktak lo uh hi. Tua takpi zong a taten ih phawk kha hetkei lai hi.

Gamdang a tungkhin tampi pawlkhat pen asepna ah paulehham, gentheih kisa in aom uh ciangin a pianna tuunlezua peuh gawh zolai uh hi. Ih khang ahoihna dingin Nu le Pa Thupha pan ki panbek hi. Pasian thu ih up ngamna zong Pate" Thupha tungpan bek in kipbek hi.

Ih phawk dending ka deih thupi khat in, " Pate Thupha a taten ih ngah khit ciangin ih nu le pa te bangzah in ei lam panin amau itna te ih phawkkha hiam cih ih ngaihsut ding leh sepding pawlkhat te ih vaihawmpah ding ka deih hi."

Ni 19 June 2011 zatnuam leh Pate' Ni Thupha Zomibup tungah hong tung semsem hen.

Thawn Tuang
Zomi Angvaan