Ka Nek/Ka Dawn Tang'

Zomite a tamzaw pianna Tuun Nu nawikhum tawh a khang lian ki tamzaw ding hi. A khangkhia lo te kamsiatna tuamtuam tawh hi kha ding hi. Nu nawikhum tawh ki khangkhia in amau nekding a lim a al teng tate hong pia masa hamtang uha, tu in ei hun-ah ih Nek ih Dawn pawlkhat Nu le Pa te ki khenthei lua lel hi cihte ki kumto ding hihang. Tua ban-ah Muhtheih Pasian it masa ding a cihte kua mite hipeuh mah hiam cihzong ki kumto ding hihang.

Lungdambawl sa nek, Kumthak sa nek, Khuado sa nek, Pawi sa nek...cihbang muinam meh ni ahi zongin nekna dawnna khat peuhpeuh ah a limpen, a limcii pen na neulai-in nang-ah dingin, anek tang hong pia ngam, hong koihsak ngam leitungah nu le pa lo midang mupeuh mah na hiam? Nu ten a ang ah nuamtak in hong om sak in amau nek ma in a mau anglam a, a om a limcii te nang hong piak denlam na phawk kha ngei hiam? A nek a dawng tang hong khen ngam leitungah midang tampi omlo aa, tuun leh zua lo in nang tungah itna man taktak a neih ding kua mu masa na hiam? Na sung panin a piang na tate na it zah khat in nang zong misung panin piang taktak na hihlam ki ngaihsun masa in. Up mawhloh in ta aneih khavat peuh na hiam? Tuate zong itna neih mahmah ihih manin, ei'te zong nu le pa sung panin Pasian in hong piangsak ahihlam phawk masa ni.

Zomiten Gan a ki gawh ciangin sa pawlkhat pen Papi sa cihkhat ki neih hi. Atom in genleng, tua papi sa pen numei naupangte ki pia lo ban ah a nek theih dinguh tamlo hi. Pa ten a nek uh ciangin taten sa a nek dinguh om keileh a nek theih ding uh a om sunsun hong khen vanvan lam na phawkkha hiam, tua bang mi na mu kha ngei hiam? Na innsung khawng zanmangin mumu na pi cin, a sunga ateeng mite ih phawk kha hiam cihzong lungngaih huai hi.
Gamdang ah i nek i dawn a lim a al ih nekte sehthumsuah sehkhat innlam a pianna nu le pa ten ne zo hetlo lai ding hi. Nu le pa te sisan neihlo in luvaii in om uh aa, a nek ante tha tampi pialo ahih manin ngawng mahmah uh hi. Tualeh gamdang panin tawmkhat beek i pianna nu le pa te a khen nuamte apia nuamte adingin ki khenthei lua mahmah hi. Ansai ah nisim in an na nekciang, na meh tui bang namte na zangh a, a tamman na leidente ni khat bekbek pianna nu le pa te adingin atawm man khat tawh ki laihthei hi. Na ut hunhun in na nek mohte ni khat bekbek nekei inla tua aitang zong ki khenthei lua hi.  Nisim ih nuntakna sungah nu le pa adingin khentheih, piak theih ding tampi tak om lua hi. Na duh mahmah khat na nek ni, a duh mahmah khat hong khenden, hong pianuam den om ngei hi cih phawk huai hi.

A diakdiak in Zomite sungah nu le pa a lungkim sak ki tam hetlo hi. Numei lam Sunghte peuh a lungkim sakzaw tampitak pasal ka mu hi. Sunghte lung kimsak pen ahoihlua hi. Midang zong lung kimsak hoih lai hi. A hi zongin khat lam lungkim sakzo ih hihleh a khatlam zong lungkim sak ding pen thupi masa taktak hi cih phawk in. Muh theihloh Pasian a um mahmah, Pasian a phat a lawp mahmah, Pasian a it mahmah tampite sungah muhthei Pasian a it hetlo tampi ka mu hi. Muh theihloh it mahmah cihpen a taktak ahihleh a muh theih nu le pa a itna tungtawn panin ki mu thei hi. Muhtheih mite it lo in, Muhtheihloh khat pum it cihpen zuau tatna ban-ah Pasian a khem mi ki suak thei lai hi.
Biakinn sung khawngah kapliangin thu ih nget sang'in pianna nu le pa tungah kap liangin thupha nget kul lianglo in ngen leng hong tung baihzaw dinga, Pasian in zong na muhtheih na pianna nu le pa na itna THUPI masa zaw ding hi. Na muh theih Pasian acih pen midang peuh sa keini, pianna nu le pa hi. Na nu le pa aom keileh na kim na pam aom na sanggamte hi.
Nu le pa te nanek nadawn tang' ding tampi khentheih na hih manin na piak nopna lungsim takpi tawh nisim in ki panto, ki sinto in ih THUPHA NAAK taktak ahih lam phawk ni.

Thawn Tuang
Zomi Angvaan
27 Dec 2011
http://zomi-angvaan.blogspot.com/