Naupang bek in muamkhum duhlo a, lamphei tawn dah omlo, kamsiam ngai dah omlo cih paunak thugil ih neih hi. Kamsiam a zangh mikhat tungah ki mawk hehthei hetlo hi. A hi zongin kamsiam khengval a zanghte miten muang zo nawnlo theihi.
Zomite zum(office) te ah hunkhat lai vaineih in i pai ciangin zum nasemten hong hoihpih kei, kamsiam kei uh cih a ki genzawh mite lungkimna ding tu-in ki hopih, na kisem taktak cih ki mu hi.
Hun khat lai in Zomite sungah thuneih khat peuh om leh gen hak pahdeuh, kamsiam paulo aw' nem zanghlo ki tam mahmah cih thu kaza ngei hi. A hizongin tuhun tawh ki tuak in makai te zong mipiten vaangpiak siamzaw ta, makai tenzong ahi ding bangin minam veizaw ta ahih manin ih lungdam hi.
Nungak leh tangval te bek in kamsiam zat ding cih ngeina om lo hi. Mi khempeuh in zatding ahihi. Naupang bek inzong kamsiam a zanghte mai ngap zawdeuh pah hi. Kawl gal kapte khat veivei i khua ah hong pai uh a, i gan khawi Uite kamsiam tawh zolzol uh a, ui ten ngai thei cih ding hi. Gan hing tenzong kamsiam ngaidah hetlo uh hi.
Zomite sungah mel ki mu keileng kampau khauh zanghthei mahmah na pi in, mel ki mu taktak leng kamsiam ih zanghpan bek hi. Mel i ki mu a, i ki mu keizongin i ki thuzak nakleh mite tungah i siam tawp in thuhoih zatding ahihi. Kamsiam i cihpen a zangh theihdeuh mi om a, a zangh theilo ki tamzaw hi.
Kamsiam zangh ding cih ciangin thuman bang, a hi bangin hoihtak in gending cih ahihi. Zuau thu tawh kamsiam zat dakdak kul lo hi. Tua ban-ah mite zaktheih ngaihtheih in kampau ding cihna hi. Khat veivei ahoih ding deih luatna tawh kam i khauhpau ciangin ahoihlo lampi lehtun zaw thei hi. Kamkhum kamsiam a hi ciangkhat zatpen zuihnop zaknop deuhse hi. Thusia lak-ah aw'khum, aw'dam bek in ki lemna piang sakzo bek hi. Zuu tawh mawhna tampi maisak hilo a, zuu phung a, a kampau aw' nem hangin mawhna a siah huaipen zong maisak thei hi zawhi. Aw' nem zat mah hoih cih ka gen nopna hi.
Mopi na mun-ah kam mal khat khauhpau na hangin vaibing thei a, aw' nem zatna hangin hunnuam ki zangh thei hi. Sialpi a liau ding lai, kam malhoih tawh Sialpi ki ngah kik thei hi. Innkuan sung a subuai pen kam( leii) hi a, leii i cihpen meikuang tawh ki bang hi. Tampi lawh thei in tampi siatna tunthei hi. Kamsiam in na tampi lawhlo aa ki lemna piangsak hi.
Kei a kipan kamsiam mite ngaihnop zaknop dingin ki sinni.
Thawn Tuang
Zomi Angvaan
http://zomi-angvaan.blogspot.com/
22 Jan 2012
0 Comments
Nong simsak manin lungdam mahmah ing.