Vuuk kiat ki panta

Ka pian ka khan in ka muh ngeiloh vuuk guahzuuk bangin kia tazen hi.
Mi ah dingin secondhand hi ta mahleh kei adingin a thak sitset ka muh
cilna ahih manin neulai khawng a, vanleng a leng et bangin ka en mai
hi.

Nashville, Tennesse ah ni 12 Jan 2012 nai 3:00pm pawl in Snow kia pen
limtak in ka enen a, lamdang ka sa hi. Snow a kia te maimom khaute ah
a tukkhak ciangin tui pahlo ahi manin a mel a sa ki tel sitset hi. A
tamzaw pen Aksi * limtawh ki bang lianlian in pa deldal hi. Vantung
ento lengleng meei sah mahmah a, tua panin hong kia suk in Paatkap na
mun a, a nengneng a leng te tawh ki bangin huihlak ah leng zeizai hi.

Hong kia semsem a, leilak khang, mawtaw tung khawngah hong tuizo pak
nawnlo ahi manin leilak vut buak hong bang phengphang mawk hi.
Singkung tampi tak a Teh om nawnlo in singkung keu tawh ki bang gemgam
hi. A hi zongin Taaksing tawh a ki bangte a Teh na leng hing sitset zo
lai veve mawk hi. Siatna sungah a hoih khatbeek om hamtang veve cih
hong lak mawk hi.

Singkung atamzaw muhnop huailo a, deih huai hetlo hi. A hi zongin tua
singkungte a zung leh a kungpi a si hi peuh mahlo hi. Mi hingte zong a
muhdah huai laitak, a it huailoh hun na om thei mahmah tawh ka teh
khak theizel hi. A hi zongin i sung tawng na hoih gige thei hi.

Khua hun i cihpen a haupen a pil penpen tenzong Pasian bawlsa na khak
tan thei hetlo hi. Tua ahih manin mite i muan masak sangin hong
piangsak, hong bawlpa muanin neih masak ding hong lak gige ahihi.
Pasian bawlsa a tuamtuamte a munmun ah i muh kawikawi ciangin a mu cil
te ading gennop, muhnop thanop huai mahmah hi.


Thawn Tuang
Zomi Angvaan
http://zomi-angvaan.blogspot.com/
12 Jan2012