Gual zawhna ding gal hiam
tuamtuam tawh Pasian in minam khat ciat, mi khat ciat khut sungah van na pia
ciat hi. Ih khut sunga om khat peuh tawh Pasian in gual zawhna hong pia nuam
leh ki ngah lualel hi. Gual zawhna ding galkap tampi neihna hang hilo, Sakol
tampi neih hang hilo Pasian vang liatna hang bek tawh galte ki zo bek ding hi.
Pasian tawh lo in gualzawhna Zomiten ki ngahlo ding hi. Pasian vang liatna
Zomite sungah aom keileh ki gual lel den ding a, miten nuai ah ki om den ding
hi.
Moses khut
sungah Thau tang om kei veh aw, Pasian in a khut aa, a tawi Ciangkhut tawh a mipihte na hon khia
sak zo hi. Pasian tawh ki zomleng lungkiat mahmah, lungneu mahmah, thanem
mahmah hun na lengin hong nusiat tuanlo hi. Amah tawh a pangkhawm den minam
ihih ding thupi hi. Amah tawh pang khawm na pi hangin ei lam panin ih sep nop
keileh a mawkna pi, thu um mi ki suak hi.
David gual
zawhna pen a thupi lua galhiam hi
zenzenlo hi. Ama ki piak khiat ngamna hangin mite in a gualzo dingin muanglo
umlo uhi. Pasian a upna hang bek tawh kalsuanlo in galhiam khat peuh tawh kuan
khia hamtang hi. Thungetna bel a ki neih theilua hi. Thungetna bek hilo sepna
tawh ih kalsuan khop ciangin ih thungetna a tangtung sak upna ngetna suak kik
hi.
Gilpi ading zonglo semlo in
thungetna bek tawh ki pang thei samlo a, thungen kawm, semkawm, zong kawm mah
dingin Pasian deihna hi. Na semlo te an pia kei un ci lai hiven. Thungetna bek
tawh panglo ding hanga, a thungen pawl, a sem khia pawl, a panpih pawl amunmun
panin ih om ciat ding a thupi ahihi.
A semte’ ading thungetsak om keileng gualzolo
ding hanga, a thungen pawl aom hangin a semkhia pawl om keileh gualzawhna ki
ngahlo ding hi. A sem te ki semsak lua keini, thungetna tawh a pangzo tenzong
thungen zo ing ci tuan keini. A ki lek kim dimdiam dingin minam bawl hi.
A gamgam tawh a buai pawl om
ding a, a minam tawh a buai pawl om ding a, a khua khua tawh a buai pawl ding
a, innkuan mel thei ta nau ciang tawh a buai pawl...cih bangin Pasian in ei a'
khop ciang ding na koih dimdem hi. Na galhiam bang nam pawl ahia leh….
Thawn Tuang
Zomi Angvaan
0 Comments
Nong simsak manin lungdam mahmah ing.