A khang A khang In

“A leh Ciah”, cih kammal pen namdang pau hih tuak hi. Ei pau in mikhat a vakna panin a inn a ciah ciang a inn nung panin a ciahte A leh Ciah cihna hilo hi. A leh Ciah cihteh lawmta mi nga ten annek simin thu a nget uh ciangin khatpa in tuni thungen aa, a zingteh khatpa in thungen kik,  ban paipai cihna in ka let hi. Hih sungah ban paipai cih thu ka deihna hi.

Ka gennop thu in:
Zomi te khangthu ka tam thei hetloh hangin a tamzaw a pa pil mahmah in a tapa hai mahmah, a pa hai mahmah in a tapa pil mahmah, a pa hau mahmah in a tapa zawng mahmah, a tapa hau mahmah in a pa zawng mahmah, a pa minthang mahmah in a tapa min thang hetlo, a tapa minthang mahmah in a pa minthang hetlo cih bang tam thei mahmah hi. A khang a khangin a pilte ahaute a minthangte ban paipai lo in ki lumletlet dan hi hang. Hih thu a hang khat om ding hi.

 

 

 

Ka upmawh thu in:

1. Pasian tungah citak lo hi ding hi hang..... thupha ngahleng manggilh baih nuam

2. Nu leh pa zahtaak dan siam lo hi ding hi hang.....nu leh pa haimuh baih, thusimlo zineih taneih sumneih pilna neihteh

3. Minam makai te lang bawl in thusimlo hi ding hi hang..... a pil zaw, a siam a teizaw ih muhteh

4. Biakna makai leh Siate zahtak lo, thu ki ngensak lo gensiat nuam hi ding hihang.... ih upmawh na sang' a seploh hong vanzawhloh ciangin

5. Pilna hauhna theihna a neihten ki phatsak pih in pualah hi ding hihang..... koi panin ka ngah cih phawk kik lo

6. Lam-et na upna kiptak khotak neihlo hi ding hi hang..... mi tung pan bek lam-en upna neih den

7. Mizawng daipaam mimawl te awlmawh khalo in simmawh hi ding hi hang.....pilna siamna hauhna ih neihteh

A khang a khangin thupha ih ngahna te a pualah in ki phatsak pih hilo zaw in mite ading leh hong bawl pa adingin thupha ih suah kimna dingin kei a ki pat thungetna mah tawh pan laleng ci-ing.

Thawn Tuang