Inn Suut Pi

Ni dang lai-in Zomite inn sung khempeuh ah inn a nangpi/a lenpi innsung laizang ah khat om aa tua pen Inn Suut Pi kici hi. Khuam dangdangte sangin muanhuai zaw aa, thupi tak in ki zangh hi. Zolai Simbu sungah Zomiten ni tumna lam nga in inn ki lam hi kici hi. Innkhuam tawh kisai tawm khat gen leng.

Inn Suut Pi i cih pen innkuam ahi manin tua khuampi tungah van tuamtuam khai/koih theina dingin bawl uh aa, tua tungah Zo Thau, Thung iip, van tuamtuam koihna/khaina in ki zangh hi. Tu hun ciangin Inn Suut Pi Zogam ah a neih tam nawnlo aa, a thei khalo tampi om ta hi hang. Tuimang khua sungah Thang Sian Dam ten neihlai aa melmuh theih dingin tuabek om lai in ka thei hi( ka theih khilh keileh).

Nu ngak heel ciang: Tangval ten nu ngak a ki hel ciangin ni tak in ki hel hi. Sun ni tang pi in ki hel khollo zaw hi. Online khawng panin nungak hel nuamlo uh aitam aw, inn mah ah nungak ki hel tangtang uh hi. Nu ngakte inn sungah meilum hawi-in nungak hel peuh mah ki tu hi. A hi zongin Inn Suut Pi lam-ah ki tu masa ngeilo hi. Lengla a kua mapeuh mi inn ah a pai ciangin Inn Sut Pi lam-ah ki tu masa ngeilo hi. Zomi ten ngeina kicing tak in ih neih hi.

Tangval ten nungak te nasep Vaimin tol, Khauzial cih bang a sep khat peuhpeuh huh uh hi. A ki tang sap khat Inn Suut Pi tungah aom hangin lengla ten lawng theih luat om lo hi.

Gal leh Sa: Ni dangin khuakhat leh khuakhat ki do in gal leh sa bangin ki sim uh hi. A galte khat a muh uh ciangin thahsawm lianlian uh hi. Ki lemna ding a ut uh ciangin lai ki khak, phone ki ho cihte om nailo hi. Galte’ mel muhbek that ding hilian hi. Gal a vengna ding ki lemna ding a ut khuaten a geel dan uh atom in.

Khuasung mi khempeuh ki kaikhawm uh aa, a hangsan ngiat, ki lem ding a ut ngiat, sih a kulleh a si ngam ding khat tel khia uh hi. Tua pa na pai vingveng aa thakhat thu-in a galte khua aa Hausa pa' inn sung lut vat in Inn Suut Pi a pom khak nakleh ki that theilo hi. Ahi zongin Hausa inn sung a galte a tunnang thubaih tuak vetlo hi.

Inn Suut Pi a pom khit ciang Hausa pa in tua mipa kiangah bang kisam na hiam, bang vai in hong pai na hiam ci-in thu dong hi. Tua mipa Ciangpi/Lawhpi tawh khuh in a dot nop teng khempeuh Hausa panin dongh hi. Tua mipa in ki lemna ding a khuabup un a thu kimna tenguh theisak hi.

Zomite Pumpeng kung bangin huih in a mut khakna lamlam ah ki hoi daidai lo aa, Inn Suut Pi bangin kiptak khotak in ih minam hihna a pom tinten te ihihi. Tu hunteh kim leh paam huhau in Pumpeng kung bangin ahoi dawidawi na Zomi Nam hikeng a ci phial om kha mah ni, a taktak in Zomi Nam khempeuh tua bangin a ki hoi dawidawi minam ihih lohlam ih ki phawksak sansan hi.

Note: Sia Cin Za Suan in Zomi Pentecostal Church Nashville TN, USA ah Inn Suut Pi tawh kisai themcik hong genna panin ka lungsim hong sukha mahmah ahih manin kong pulak kik hi.

Thawn Tuang