Tanglai Zolai Gelhzia

Zolai ih neih cil in laigual laimal a halna cihte a ki pat ki cing pahlo a, tu dongin deih bang taktak ta keileh a simdan nuamzaw deuh ahih manin mailam-ah ki cingto semsem ding lam-en ing. Tedim ah ZCD Zum hon na Signboard a khat pen tungah Tanglai ate Zolai gelh dan,  “Zo Minam”, cih laimal gawm ka muhteh Zo Minam cih laimal gawm tawh kisai mawhsakna lam hilo zaw in adikzaw amanzaw ah ih kal suantohna te pulak lo in ka om thei kei hi.

 

Lai Siangtho a ki gelh cil in a lian aneu ki gelhlo hih tuak hi. Ki hal mello ki gawm manggawp hi tuak lai hi. Lai pilna ahunhun in khangto semsem aa, a simnuam zaw aman zaw  ki telto semsem ahih manin tu hunteh  a zatnuam asimdan nuamzaw mahmah ta hi.

 

Ni dangin, “to pa hoih na sin un la hoih hi ci in thei un”, ahih keileh “ topahoihnasinunlahoihhiciintheiun”, cih bang danin ki gelh hi mahleh ahunzui in ki zuuntoto a, a simdan awsuah dan nuamzaw deuh dingin ki puahto zel hi. Man tatak ei cih lian ahihloh hangin, “Topa hoihna sin unla hoih hi ci-in thei un”, cih dan hileh simnuam zaw, laimal gawm a dikzaw hong suak hi. Topa pen, ' To pa ', ci-in gelhleng a khiatna a ki tel hangin laimal gawm/a halna dik keileh ki lawm hi.

 

Zomi cih pen minam min ahih manin, “Zo mi” ci leng ki telsiam veve na pi tu hunteh laimal gawm dik hetlo hong suak hi. Zolai a thei masa ten hih ciang hong zuuntohtoh uh pen lungdam huai mahmah hi. Laimal gawm, a halna cihte nidang adan ci-in bullet tentan ding hi samlo aa, pampaih neusek pah dingzong hilo hi. Tuate siksan mah in a cingzaw adikzaw sem dingin a zangh ding, a puahto ding ih om pen minam kician khat ihihna hi.

 

Zo Minam Ni ki ci-in ki gelh nawnlo aa, Zomi Nam Ni ki gelh ciat ta hi.

Zo Minam kici-in nawnlo aa, Zomi Nam ci-in ki gelh ciatta hi.

 

A huampi in a mite genna sungah Zomi minam cih dan zong dik sem hi. Zomi minam sungah lai thei masa ten puahtoh nawnloh ding Lai na bawllo uhhi. A picing adikzaw semsem ding amau zong lunggulhpi penin neih ding uhi.

 

Zomi Nam Ni hong nai mahmahta ahih manin laimal gawmdan kum dang sang' in a picing a dikzaw mi kimin ih thei semsem manin a khangto minam ih suak semsem hi.

Zomi hih mah nuamto zel ei.

Thawn Tuang

Zomi Angvaan

Jan 15, 2013

----------

Michael Hungpi	1/15/13
to zominam

 

 

Laimal simnop kasak dante;

* Zominam
* Zominam Ni
* Zominam Pawi
* Zomite
* Zomiten
* Zola
* Zolai
* Zogam
* Zotui
* Zosun Ni
* Zolen Taang
* Zo-ann
* Zo-inn
* Zomi
* Zolia
* Zotaang
* Zothau
* Zosiam
* Zolengthe
* Zomi galkap
* Zomi mipil
* Zomi mihau
* Zomi lasiam
* Zomi melhoih
* Zomi thahat
* Zogam leitang
* Zogam damtui
* Zogam huihkhi cih bang danin Zolai pen asimnop pen leh atelnop pen-a igelh theih ding kisam kasa mahmah hi. Ahizongin, khat leh khat in izatzia kibanglo theimah ding hi. Akinaithei pen dingin gualh thei ding kisam kasa mahmah hi. Zolai icih mah bangin Zomi khempeuh tawh kisai thu ahih manin, kikup kup ding tepawl in kangaih sun hi.

Lunglut luatna tawh,

Dal Sian Hung
Kuala Lumpur, Malaysia.