Kum tampi a ki zanghzangh sa, na sep asiamsa tampi om mahveh aw, a ki deih pen a siamsa kumtampi a ki zanghzangh sa hikei. A zatnop na ah mittaw sial khaulet bangin alenlo Jesus in, a kisin nailo mah deihin teelzaw hi. A na semte bang hileng na zat nopleh nang na zangh oo keitawh ki sai kei, ci khani. Amau tua cilo.
Kum tampi ih dinpih Zomi National 2012 kumin ih mangthang hi. A tamzaw lai ih ki sak theihpih ZBC 2013 March kha mah in ih neih nawn kei aa, Zomi munteng Chin tawh ki laihta hi. Pasian in Zomi awl mawhlo mawleh, ngawtna hong pia liang hiam ci kha ni. Hilo hi.
Tui bang a luang khawm dingin hong sekna hi kha ding hi. Lai natna mel neilo Zomi lah ci buang, Chin lah aci kawikawi Zomi makai te sangin a ki sin nailo Tuailai momno te hangsan tak in hong zangh nuam hizaw kha ding hi. Gam tuamtuam tung khin uh aa aminam min uh dihpih ngam tuanlo uh, Chin mah cici lai uh, Tuailai momno te ih minam min uh khauhtak kiptak in hong tompihnuam hizaw ding hi.
A ki sin nailo a ki zat mah bangin kum tampi a ki zanghte sangin eite hong zangnuam zawta cih phawk ni. Tuailai momno te hong zat hangin La no neihte a ki piak kik bangin a khangham te tawh maban zom khop veve hong deih hizaw hi.
Ih sisan kheng thei khang, ih minam kheng theikhang, tua pipi namdang min tawh hong ki sapsap ding kuamah ut tuan samlo hihang.
A tawpna ah ei leh ei ki neusek luadeuh sam hihang. Mi haikhat in pil hong ci-in Hai hong cileh a tehna piiciang kanlo in himah hang ei ci pahpah hi hang. Tua pen Kawlte hong uk cipna panin lauhna thuman dinpih ngamlo hong ki pan ahihi. Tuate a zalh tam ding Tuailai momno te hong zangh nuam petmah hita ding hi.
A siam nailo a kisin nailo gualzawhna tawh Jerusalem Jesu a lut ding ciangin a zatnop sese mah bangin Tuailai momno te hong zangh nuam sese hi ding hi. Kum tampi a ki zangh sa te zanghlo aa, gam leh minam adingin a kisin nailo te hong ki pan khiasak nuam hizaw hi.
Happy Palm Sunday
Thawn Tuang
Zomi Angvaan
March 24, 2013
0 Comments
Nong simsak manin lungdam mahmah ing.