Dr. David Pauno Music City hong zin

Thu suak neihten a suaksak pakpak ngamloh uh USA leitang( David Pauno cih dan) ah hong zinin Music City( Nashville, Tenneesse, USA) zong ni July 21.2013( Sunday) ni hun hong zatna ah ka ki hel kha hi. A mah pen:

Amin taktak Langh En Pau

A khua Mauvom khua, Cikha huam

Min ki sapna pawl khat David Pauno a ci pawl om, MV Pauno a ci pawl om, Dr.Pauno aci pawl om, Sia Pauno aci pawl om hi. Tua ban-ah Zomi Video Director pi khat ahihi. A tamzaw in, “ Teek leh Mo”, cih Video hong bawl khia pa in ki thei aa, Lapuak siam in Lasak zong siam mahmah hi.  A lasa/phuakte sungah “Pasian zong sakni”( Nungak khat hong paisuk mizong sa kei phial ing...)  cih la zong hong sa in tha ki ngah mahmah ban-ah khangnote lungsim la mahmah hi.

 

Lai Siangtho John 14:6," Jesu in a genna ah,  kei mah in lampi ka hihi. Thumanna leh cihtakna zong ka hihi. Kei hong suanglo in kuamah Pa kiang tung theilo ding hi", cih kammal tawh hanthotna hong nei hi.

 

Khatna ah Lampi ih cih in mihau milian mipil a zawng amang deidanlo a ut peuhpeuh tot theina hi. Hih Lampi pen Greek ten Lampi maimai a genna ahihloh lam hong telgen hi. Utut na peuh Lampi tawnleng i tupna  ki tun theilo hi. Pasian bek mah lampi in i neih ding hong pulak hi.

 

Nihna ah Thuman na bek adeih Pasian ahihna hangsan tak in hong gen hi. Pasianna i sem aa, na khat peuhpeuh i sep ciangin Thumanna tawh i sepleh Pasian a ihihi ci hi.

 

Tua hun sungin a la phuah, "Hi ciang tung ding ki sa zo keng...Ka nuntakna ka ngaihsut ciang", http://www.youtube.com/watch?v=MMFMQfxOOe8 cih hong sa hi. I pilna i siamna tawh hilo Pasian vang liatna tawh hih ciang hong tungsak ahih lam hong phawksak mahmah hi.

 

Thumna ah Cihtakna lo tawh na sepna pen Pasian in adeihloh lam hong gen hi. Pasian ading i ki piak vetleh ki piasuak ding, haksatna i tuahteh khol thimthum lo ding ahihna tawh han thotna hong neih hi.

 

 

La hong sa zel in hanthotna tawh hong thuahto kawmkawm aa Zomite biakinn dim phitphet hi. A thugenna sungah Thugil kammal cik tampi ki hel om hi. MP3 khawngah khumin letkhia hileng ki cing sitset in nuntakpih mahmah ding hihang. A ki khawm mi peuh lung kimtak in innlam hong zuansak hi.

 

USA gam sung Zomite om om na ah Sia David Pauno saptak mahmah hi. Nuntakna hoih tawh Pasian in Zomite hong puah to semsem hen.

 

Thagahna leh nuntak pihding ka muh lungdamna lianpi tawh..

Belhtuah file ah photo pawlkhat hong khak ing

 

Thawn Tuang

Zomi Angvaan( Pasian Angvaan Minam)

Ka Laikung panin::http://zomi-angvaan.blogspot.com/

Tue, Jul 23, 2013