Minam Makai Ding Kua?

Zomi sungah minam ading makai asemsa te ka ngaihsut ciangin teel khial hetlo leh muantaak takpi uh aa, hong sep takpi uh hi. Hong pailai ding kumte ah kua teelcing dinga kua muantaak ding hiam? cih ka ngaisut teh bang mah ka theihloh man hiam sinkham huai ka sa mahmah hi.

Tuni ciangciang minam makai pawl khatte en masa phot leng.

A beisa aa Pu Mang Tung Nungte zom ah 1990 kumin General election ah Zomi  MP dingin mipi in 17 ki tel khia hi. Chin State pan 13 , State pualam pan 4 ahi uh hi.


A beisa kum 50 lai-in Tonzang zong Tedim uksung ahihi. Tedim gam uk sungah constitution 3 om in 1990 election in ZNC pan 2, NLD pan 1 mipi in telkhia uh hi. Tuate in;


1. Pu Cin Sian Thang.LL.B Tedim I, (President, ZNC )

2. Pu Thang Lian Pau M.Sc Tonzang (General Secy, ZNC )

3. Pu Ngin Thang ,LL.B, Tedim II, (NLD)

 

Hih teng Mipi Palai-MP dingin ki teelkhia hi.

Tu-in hih MP 3 te dinmun en leuleu leng;

1. Pu Cin Sian Thang... Member CRPP

2. Pu Thang Lian Pau ...President ZRO

3. Pu Ngin Thang ...(NLD a thu zakna neih keng)

ahizongin ki ukna zui in ahunhun in mipi in minam makaite teel khial hetlo ihihna ki tel sitset hi.



Zomibup in akhang akhangin Equality and Self-determination kideih tawntungin tua deihna paipih ding palai "teelnuam den uh hi, teelden uh hi" cih ih thei ding ka ut hi.


Tu laitak in hih a tunga MP 3 te'  ki hello teel kik ding hileng kua? 

 

Sing om lohna ah gua a ki zanghte hi ung acici te mah  teelcing takpi ding ahiam?  Amau mahmah a ki muang ngam takpi ding uh hiam? Mipi in ih muangzo takpi ding hiam? Minam maikai dinmun a liangko tung uh ah suanleng hong puazo takpi ding uhhiam? 

A tunga MP 3 te ban-an minam makai ding peuhmah in, 'upa te ahizongin biakna makaite ahi zongin thu leh la ki dotbawl diamdiam in mapang khawm diamdiam leng' hoih ding hi. Thu ki dot bawllo in, mi ngaihsut piakna te thusimlo in ih om khak leh minam makai cingtaak hi ngeilo ding hihang.

 

Hong piangpiang lel ding hi ei, a dandan om lel ding hi ei, sin kham huai masa kei...cih bang ici kha hiam? Minam vai ah pilna aneih sangin sum neih tamzaw ihih manin minam makai zo taktak ding khangthakte sungah kuamah ka theihloh man hiam ka sin kham hi.

 

Mimal muhna tawh

 

 

 

Thawn Tuang

Zomi Angvaan( Pasian Angvaan Minam)

Ka Laikung panin::http://zomi-angvaan.blogspot.com/

Sept 1, 2013