Numei leh Suang Manpha

Gensuk pah leng. A hau mahmah tangval khat in bang mah aneihlo a
innveengpa zi( angkawi) hong deih hi. Tua tangvalpa in Suang Manpha
cihte ahoihnono neih hi. A haulo nupa te ahihleh ahauhloh uh hangin
nupa nuam ki sa in. ki-itna kiptak neih uh ahih manin kuamah dang
ngaihsut in neihlo uh hi.


Nupa kopte pen a zi pilzaw teitangzaw citciat hi. Ahau tangval pa
ahihleh nungak dang sangin avengpa zi deih citciat hi. Tangvalpa in
keipen mihau mahmah ka hihna ka khuapih ka mipihten zong hong thei
ahihteh hih ka deih ka veengpa zi pen ka veengpa kiangah Suang Manpha
a lianpen  tawh khekleng utlel ding hi cih ngaihsun hi. Ahi zongin a
kamtawh gen ngam taktak lo hi.


Khaivei tangvalpa in a innveengpa  a inn ah sam hi. A inn veengpa zong
paipah hi. Tangval pa in a Suang Manpha hoihnono a neihteng lak hi.


Tangvalpa in a innvengpa kiangah lawm-aw kei inn sunga na deih penpen
leh. nang inn sunga ka deih penpen ki khek ni ci hi. A inn veengpa in
ko nupa in bang mah neih kei ung, vanhoih omlo neihlo hi ung. Ko nupa
pen zawnglua. mahmah ung. Na deih ding om hetlo hi ci hi.  Tangvalpa'n
pha mawhlo hi, ka deih khat peuhpeuh tawh ki khekni va ciah inla na zi
tawh hong ki kum un ci hi. A innveengpa' zong ciahpah hi. Inn a tunbek
a zi kiangah innveengpa( Tangvalpa )in Suang Manpha lianpipi ahoihnono
neih aa, ama inn sunga aom ih deih khat peuhpeuh leh ei inn sunga aom
ama deih khat peuhpeuh  ki khek ni hong ci hi. Ki khek leng a Suang
Manpha hoih mahmah pen ngah ding hang aa, ei nupa pen mihaupi sum
haupi ih suak dinga nang bang diakdiak mihau nu hong ki ci ding hi cih
a pasal in a zi tungah gen hi. A zi in a innveengpa in ei inn sungah a
deih ding omlo hi ci hi. A pasal in phamawhlo hi ama hong cih a hih
manin ih van neihteng inn sung tengah koih khia ni ci hi. A zi pen na
pilvang mahmah ahih manin hih ka veengpa in keilo adeih ding inn
sungah omlo ahihteh cih a lungsim ah neihpah hi. A hi zongin a pasal
tungah gen lo hi. Ki niam khiat tak in om hi.


A zi-in a pasal kiangah tua ahihleh innveengpa kiangah na ih deih khat
peuhpeuh ih ki khek dinga, ahi zongin ih inn sunga vante enen ding
hang aa, ih lawnkhak( ih koihkhak), ih matkhak masak penpen tawh ki
khekni va ci-in la, a ut leh laibawl in ki khek ni, va ci-in cih a zi
in a pasal sawl hi. A pasal zong lawp tak in a innveengpa kiangah a zi
vai khak bang teng gen hi. A inn veengpa ( Tangvalpa) zong ut pah in
laibawlna neih pah uh hi. Tangval
pa in a innveengpa zi ngah ding cih lawp mahmah hi.   Tangvalpa in a
veengpa kiangah ka inn sunga na deih penpen no na teel masa ding hi
cih gen aa, thu kimna lai bawl uh hi.

Van a ki khek ni ding uh hong tungta hi. Bangmah a neihlo nupa kopte zong
ahau dingte hi ung ci-in Tangvalpa inn ah deih bang teel dingin pai uh hi.


Tangvalpa in a neih alam Suang Manpha a ki pat a inn sungah koih khia
zihziah hi. Nupa ten zong a deih penpen uh Suang Manpha la uh aa, ciah
pah laulau uh hi. Tangval pa in na ciah unla na inn sung vua teel thei
ding teng na koih khia unla na man uhteh hong sam un cihi.
Nupa te zong a inn sung vuah a neih alamteng koih khia uh hi. A koih khiat
khit uh ciangin a lawmnu ( a zi in) u-aw tangval pa na sap ma in, kei pen
ih Vaimin Laang( Innkham) tungah ka om dinga tua panin kong en suk
ding hi ci hi. A lawmnu zong Kahlei khat la aa, a Vaimimlaang( a
innkham) tungah
kahto in aom hi. Tua Kahlei a zat khit ciangin a pasal in kong ngei ah koih
hi. A pasal zong a innveengpa sam dingin pai hi.


Tangvalpa zong a deih penpen ngah ding cih ki lam-en in a veengten pai
lanlan hi. Nupa te inn a tun ciangin a inn sungah van tuamtuam teel
theihding a koih pawlkhat Tangvalpa in a et et pong hangin ama deih taktak
a veengpa zi mulo ahih manin a veengpa kiangah na inn sung vuah hihteng
taktak mah hiam? a kim takpi mah hiam? ci-in Tangval pa in dongdong hi.
Innteekpa in hih teengbek hi ci hi. A hi zongin Tangvalpa lungkim taktak lo
in khua dakdak aa, a inn sung uh panin a tunglam a et leh innteek nu Vaimin
laangah a om mu hi. Tangvalpa in innteekpa kiangah aw!!! kim mah ee mate ci
hi. Innteekpa in na deih penpen la meng inla ciahta in ci hi. Tangvalpa in
a deih penpen innteekpa zi a khuttawh banlo ahih manin a kiim a ngeiteng a
etleh Kahlei mu hi. Hih Kahlei aom hoih peuh mah ei ci-in Tangvalpa lungdam
mahmah hi. Tangvalpa in innteekpa kiangah la taktak ta ningin ciahpah ning
maw ci hi. Innteekpa in la mengmeng inla ciahpah in ci hi.


 Tangvalpa in thakhah thu in ki ging zeza sa mah in innteekpa zi lakna ding
Kahlei hong la hi. Innteekpa in Tangvalpa kiangah hih na lak Kahlei tawh
ciahpah in ci hi. Ko nupa in zong ka lak masak penpen mah tawh ciah pah
ung, ih laibawlsa bangin gamta ni ci-in Tangvalpa zong utlo pipi hehsa pipi
in Kahlei tawh ciah aa, a inn a tun ciangin Sih heh hi. Bang mah neihloh
hangin ki-it peuh leng Leitung nuam mahmah lel hi. Lungkim hun a neih
ngeilo ih cihte pen Itna diktak a neihlo te hi.


Minam sung, Khuasung, Ki pawlna sung, innkuan sung, nupa kaal sung...cihte
ah Itna ngiat tawh kalsuanna lam-ah a piangsakpa in gualzawhna pia aa, pil
ing, hau ing, siam ing...ci-in Itna neih keileng piangsakpa in matutna
taktak leh lungdeih pialo hi. Itna neihna mahtawh hong piangsak pa in hong
gum ngam khin hi. Itna ih cih bangtan hi aa, bang ciang huam hiam cihte mai
lam-ah zomlai ni.



Na it na zi tawh a nuam theithei in om in, tomkal na nuntaak sung na
lawhtaak ding tua bek mah ahihi. Na minam pihte tawh a nuam theithei in om
in...thubullet Thuhilhna 9:9.

Pasian deihna tawh ki tuak in a ki-it Zomite ihihi.


Thawn Tuang
Zomi Angvaan
Thu, Oct 31, 2013