Nu kam vai khak nu nung pen

Tangthu ka zak ngei khat ah gam dangah zin dingin a ki thoi numei
nungak khat om hi. Amah pen pasal khat in a zi dingin a sap ahihi.
Zongeina tawh ah kipii ki lakna neih khin uhhi. Tua zawh a sawtlo in
Mawtaw tawh hong zinta uhhi. Mel theih tanau tengin Aktui aktak a puak
dinguh pia ciat uhhi.


Khua nawl a tunteh a Nu in a kamvai khakna ah hih bang ahihi. Ka tanu
aw Jesus tawh na tonin aw...Topa tawh na tonin aw..ci-in thumvei
kamvai khak hi. A tanu in a Nu kam vai khakna a zakteh ciamnuih bawl
vial hi. Bang ci hiam cihleh Nu aw ka tutna uh dimluata ki ngakluata
hi. Vankoihna a nungah Aktui te tawh na tu khawm mai hen o cih san
nilnel hi. Nuih san hithiat hi.

A pianna Nu in itna leh deihsakna tawh kam a vaikhak pen na ciamnuih
bawl gawp in a om laitak in a khangdiak mah ah Mawtaw hong ki bungin a
sunga a tuangteng khempeuh si khin hi. A ki tambaih mahmah Aktui te
vante a ki sia om hetlo hici hi. Jesus omom na peuh kipin kho taktak
ahihna ki lang hi. A Nu in Jesus tawh na tonden peuhleh sihna guam
thuk sung na leng a nawk hangin a lauh huailoh zia na tel mahmah
ahihna tawh kam a vai khak ahihi. Nu leh pa kammal sungah Pasian in
thupha thusia koih gige hi.


Nu in hong dampih lai, hong dampih nawtloh ahi zongin phone pan maw,
mel leh sa ki mai tuahna pan maw Nu tawh ki ho tawp penpen ngaihsun
in. Nu te a lung a kimsak mi na hiam? A kha sia sak mi na hiam? A
dahsak mi na hih zenzenleh ki sik kikna tawh thungenin hopih kik in.
Na hopih kik keileh na hau zongin, na pil zongin a lung nuam ngeilo
ban-ah khang ki zom hauhna pilna in hong zuilo ding hi. Nu a neih
nawnlo Nu a khasia sak na hihleh zong Topa lam ah ki hei-inla thungen
in ki sikna thu Singlamteh phung tunin. Tua bek in mawh hong maisakzo
bek ding hi.

Lungdam.

Thawn Tuang
May 10,2015
www.zomi-angvaan.blogspot.com