Zusa Nungak Melhoih mahmah tangthu

Zusa khat limlang mai ah ki puahpuah in amah leh amah hoih ki sa gawp
hi. A inn pua lam ah apaileh Ni ( sun) na taang hi. Tua Ni vang hoihsa
mahmah ahih manin kei pen Ni bek tawh ki lawm pen ning ci-in, a vang
pha mahmah Ni kiangah pai hi.

Ni in zong kei sangin Meii(cloud) vanglian zaw hi. Meiikai pi in kei
hong liah ziau leh ka lim lel hi cihi. Tua ciangin Zusa nungak melhoih
zong Meiikai pi kiangah pai leuleu hi. Meiikai pi-in Zusa nungak
melhoih aw kei sangin Huihpi vanglian zaw, hatzaw hi. Kei hong mut pai
mang ziau thei hi cihi.

Zusa nungak zong Huihpi kiangah pai leuleu hi. Huihpi-in kei sangin
hua lai aa, Singkhuampi hatzaw hi. Bang zah takin Huih in ka mut
hangin bang mah ci vetlo hi ci leuleu hi. Zusa nungak zong Singkhuampi
kiangah pai leuleu hi. Singkhuampi-in kei sangin hua lai aom gan hing
Sai hatzaw hi. Tha khat thu in kei a molpi tawh hong satleh ka zan
mang thei hi-ing ci leuleu hi. Zusa nungak melhoih zong Sai kiangah
pai leuleu hi. Sai-in kei ka gol mahmah hangin hih ka ki khihna
Khauhual in a ut ut na ah hong kai thei in, hong khihcip gawpleh ka si
ding hi. Amah thahat zaw hici hi. Sai-in Khauhual kiangah pai-in ci-in
sawl leuleu hi. Zusa nungak zong Khauhual kiangah pai leuleu hi.
Khauhual in Zusa nungak kiangah ken Sai khawng, Sial khawng, Sakol
khawng, Lawi khawng... ganhing tuamtuam ka khihzawh hangin hua lai aom
Zusa in a Ha hiam mahmah tawh hong petpet leh ka ki tat lel hi. Ama
kiangah na pai-in ci leuleu hi. Zusa nungak melhoih zong a tawptawpna
ah kuamah in na deih tuan samlo in a sa pihte kiang tung kik veve hi.
A sa pi Zusa tawh itna kip tak tawh ki teng kik veve. Phadawm lai ei
maw..a sa pihten deih nawn kei laileh....

Zusa nungak melhoih bangin mihingte zong a om theilua hi. Ih mipihte
sangin nam dangte ih thupit sak luat leh namdangten hong cimtak
khitteh, hong deih suak taktak nawnlo in hong nawl khinkhin lel ding
hi. A tawpna ah ih neu et, ih mipihte kiang mah ki tung kik pelmawh
thei hi.

Zomi hi na pi Zomi hi kei hang ee ci aa, Zomi Zopau Zongeina....cihte
ih neu muh khak leh a tawpna ah na ciah kik nading mah hong hi veve
ding hi.

Biakna tawh kisai ah zong Jesuh kisam kei, kamtuam pau kisam kei,
laamna dianna ki sam kei...a Thupha bek hi-ih ki sap icih khakleh maw,
a tawpna ah hihte mikim in ih ki sap penpen hi mawk veh e na ci ding
hi. Na mu kha veve dinga, tua ni ciangin a muhbek mu in a tung khalo
ihih khak ding dah huai mahmah hi.  Lungdam.

Thawn Tuang
May 3,2015www.zomi-angvaan.blogspot.com