Zusa te zong Thu kikum

Zusa leh Zawhngeu nam leh nam buaina khauh semsem ahih manin Zusa ten
bang cileh ei ci manglo ding cih hong ngaihsun uhhi.Ki ging kholnuam
uhhi. Tua ahih manin Zusa te zong ahi theiteng meetting ki kaikhawm
pak uh hi. Khat pa hong dingto pah hi. Bang ci hiam cihleh ih gal pa
Zawhngeu a om om na bang cih ki theih ding cih hong  pulak hi. Khat pa
in a omom na ih theihna dingin thu kan miten a zuih den kul ding hi
cihi. Amau theihloh kal in Zawhngeu zuih simsim kul ding hi cihi.
Khat pa leuleu in keima hoihsak khat om hi. Ih gal pa Zawhngeu pen
hong pai hun ding ki theilo ihih mut kal zong hi thei, ih an nek
laitak, ih ki mawl ngeingai laitak zong hi thei ahih manin Zawhngeu
Long-ok sak ni cihi. Long-ok sak leng hong pai hunhun ki theih pah
dinga ei ih ki kem theih pah ding cihi. Khat pa in tua thu kim ing ei
ci pah lian hi. A vekpi un thukim uhhi. Hoihzong sa uhhi. Tualeh a
Long bangte ok sak ding cih ki kum leuleu uhhi. Long-ok sak ding ihih
leh a gin ngaih mah ok sak ni, gamla pi panin hong pai ki thei pah
ding ci hi. A vekpi un thukim in hoihsa ciat  uhhi.

Zawhngeu Long ok sak ding uh thu kim khin uhhi. Khat pa in a tawpna ah
tualeh, " Zawngeu kua in Long ok sak ding", hong cihi. Tua ahihleh
Zawhngeu Long ok sak ding kua..acih uhleh kuamah  pau sese lo uhhi.
Banghang hiam cihleh Zawhngeu Long-ok sak ding pen hoih mahmah sa ciat
na pi-in a sem khiat ngam taktak, ka sih lehzong ka si mai ding hi aci
om lo uhhi.

Thu khat peuhpeuh hoih ih sak mahmah hangin sep khiat taktak ding
haksa ki sa ciat hi. A hoih a theilo hilo, sih tan dongin mapang khawm
ngam, a ki zui ngam, nungzui ngam, makai ngam ding Leitung mi khempeuh
in haksa a sak pen hi. Thu hoih a geelgeel aa, a sem ngamlo te zong
mawhsak nang om tuanlo aa, thu geelgeelna tung tawn panin a sep ngam,
a sep ngamlo ih om na zong a bucing minam suahna zong ahihi. Geel siam
mahmah semlo a om ding mah hi, geelsiam hetlo in a geelsiamte geelsa a
sem ngam zong aom ding mah hi. A geelsiam omlo, a sem ngam omlo minam
pen adah huai hizaw hi. Ih sep theihna bangbang ki simmawh sak tuam
nang omlo hi. Mi khat peuhpeuh a cingtaak sinsen dingin muh hoihlo aa,
lungsim siang dingin muh hoih hi.Lungdam.

Thawn Tuang
April 4,2015www.zomi-angvaan.blogspot.com