Hun in Itna ki lang khia sak ( Zingsol k Khanno)

Hun in Itna ki lang khia sak

Khua hong muita hi. Nangpangno khat a dai khipkhep lenglakhan ah dai tak in a om dide hangin lungngai zel, khuadak zel in lam et khat a nei tawh a ki bang hi. Khe ging khat za leh innkong khakpi lam a en pheizel hi. Motor gingkhat za leh tawlet panin innpua lam en khiazel in aom hi. Amah ahihleh a nu in nusia ahih manin tagah lungleng khuangai khat ahihi. Hih in a hihleh a nu nusiat zawh nitak simin ama pianzia khat zong ahihi. Ni khat..

 

Zum panin nasem gimna leh tawlna tawh Papi pa innsung hong lut suk hi. Tua laitak in lenglakha panin a tapa Papipa gei ah hong taiphei in...

 

Tapa: " Papa, kong dot nop khat om hiven?"

 

Papi pa : " Bang thu ahia, Bawi?"

 

Tapa : " Papa, Nang maw na nasepna ah nai khat in sum bang zah na ngah aa?

 

Papi pa : " Hi pen nang buai ding hilo, A bang cia hi bang peuh hong dong na hia?"

 

Tapa; " Thei nuam pong kaih ciang a."

 

Apa hap khat a tuah ciangin, nau pangpa a mai hong mial in a lukun suk hi. Ahi hangin

 

" Hehpihna tawh hong genve maw Pa, na nasepna ah maikhat in bang zah sum ngah na hia?" ci-in a pa kiangah hong dong teitei hi.

 

" A bang cia thei nuam teltal na hia? Nai khat in Dollar 100 ngah ing ei, na lung a kimta na?"

 

" Aw!" cih kawmsa mah in a pa maitang en ngamlo in hong kun ngiungeu lai hi. Tua khit ciangin,
 

"Papa, dollar 50 khawng hong lei tawi nuam hi veng a ki ngahdia?"

 

A tapa kampau a zak ciangin Papi pa a dipngek botkhiat hong bangin a sin hong so vat hi.

 

" Nong thudot pen hi bang leltak na deih man maw? Papa kiang pan sum ngen dingin bang mah aa aki zangh thei ngaplo, a thupi ngaplo mawtawno peuh, milimno peuh lei dingin lupna khan sungah nang guak bek nop tak in ki mawl hiathiat lel ding na ci maw. Bang hangin hi ci liang aa nang ma angsung nopna ding bek ngaihsun na hia. Ken nisim khual-ul luang zong nual manlo, gim liangaa na ka sep pen hi dbang a haivai gamtat luhek khat leltak aa ding maw, nang le nang ki ngaihsun pha o?"

 

A pa kiang panin hapkhat bek thamloh tanghkhatui a kha mahmah pawlkhat zakha ahih manin naupangno pa zong paulo phunlo in damtak in a khan sungah hong lut in kong hong khak kik hi.

 

Papi pa ahih leh nak hehlua mahmah ahih manin a nasep puanzong laih manlo in a gei aa om tutphah tungah tusuk in a tapa kampaute hong ngaihsun kikik hi. Hi bang dotna hong neihna leh sum hong nget ngam mawk pen abang hiam? Kei a pa hong hehpihlo, hong theisiamlo zazen hiam? ci-in nak ngaihsut semsem in a hehsuak semsem aa tuateng tawh lengla khan ah tawlkhat hong tucip hi.

 

Hun ahi ciang khat hong bei khit ciangin Papipa a lung hong daita hi. Dena thupiangte hoihtak in hong ngaihsun kik hi. " Ka tapa in sum 50 hong ngetna pen ahang khat, aki sapna mahmah khat om hiding hiven maw. Nidang aa lah sum hong ngenngei cih lah hi peuhmah lo aa", cih kawmsa in a tapa lutna khan kong khak hongin a tapa khan sungah hong luttum hi.

 

Papi pa : " Bawi, nang ih mu khinta maw",

 

Tapa : Kei ih mu nailo papa.
 

Papi pa : Ka ngaihsut phatphat ciangin den a thupen ken na nak ngaihsut lua kha ingh. Tuni bel nisa lua mawk ei, huuu!!!..( khuisa kawm)..den aa kong khasiatsakna ka kampau te dokkik ingei maw, hong maisak o maw Bawi. Hiah den nong nget sum 50 maw..

 

Naupangno pa a lupna pan thoto in hong nuih mai kik seisai hi.

 

Wow..Papa lungdam lua..a cih kawmsa in a lukham nuai a khuttawh hong sawk hi. A lukhamnuai panin sumnen kikhep pawlkhat hong lakhia hi. Papi pa in amuh ciangin a heh suak kik vatta leuleu in amai a san teitai hi. Naupangno pa in a sumnen ki khepte zalkhia kawmin hong sim hi. A man ciangin a pa maitang hong en to hi.

 

Papi pa : A bang ci a sum tuazah nei aa kei tungah sum hong ngen teitei na hia?

 

Tapa : Ka sum neihte ki cingnlo ai ciang aa, Papa nang hong piak tawh tun ki cingta ei.

 

Papi pa aw, ken tun sum 100 nei ta ing. E maw...kei maw na hun naikhat nong leisak thei dia? Zingciang nitak inn ah naikhat hong ciahbaih zaw ve maw. Ken nang tawh nitak an ne khawmnuam hiveng.

 

Atapa kampau a zak ciangin Papipa aci hong hikvat liang hi. A khut zakphei in a ang sungah a tapa hong pom hi. A tapa tungah a itna te a laksiamlohna, na sepna ah a hun tamzaw abei nate hangin a tapa bek a nusiat khakna cihte amaisak nading leh nidang ciangin a tapa tawh nitak an nekhawm bek thamloh a tapa laite etpih, bawlpih leh manhun te ah ki mawl khawm vak khawmni maw ci-in a pa in Khitui luangkawmsa in kamciam hong pia hi.

 

Khat veivei ciangin nuntakna ah na sep hahkat in khangtohna dingin ki hanciam hi. A hi zongin nuntakna a thupi, amanpha mi pawlkhat hun pawlkhatte ih phawk man kei kha thei hi. Aman in cileng i nuntakna ah na seploh in khantohna aomloh mah bangin nu leh pa, zi leh ta, u leh nau, lawm leh guallo in nuntakna kicing ki nei lo zel hi.

 

Nu leh pa, zi leh ta tawh om khop hithiat hun nei manlo liangin i hunte ki khengsak kei ni. Nai khat in sum tampi i ngahna ai hun manpha tawmno khat i innkuanpih, i it i ngaih khat aading i zangh khia ngam hiam?

 

A zenzen in zing ciang bangin a si ding hi lecin na nasepna company/zum in nang munah a sem ding khat baihtak in na guang lel ding hi. A hizongin na nusiat na innkuanpih, na lawm leh gual te adingin cikmah hun in a ki behlap thei ziau hilo in nang mah mun pen anuntak sungun om kip suak ding ahihi. Ih innkuanpihte sangin i na sepna ah hun tampi piakha zaw ihiam cih ki sitpha ciat ni.
 

Hun in itna ki lang khia sak hi.
 

Nk Khanno ( Zingsol)