Galkap mang lian mahmah khat a paisim in kong cing mi khempeuh in bia uh hi mahleh kong cing pasal khat in bia nuam vetlo ( zahtaklo hilo), a lu kunsuk nuamvetlo hi. Tamvei lua mahmah ahih manin Galmang mangpa in hong theita hi. Hih thu hangin Galkap mangpa sinso ahih manin kumpipa kiangah i gam sungah ei hong langpan om hi, hong zahtaklo om hi cihthu puak hi. Tua mite thatloh phamawh hi cihthu kumpipa tungah a genleh kumpipa in thukimna pia hi.
Mi khat hangin minam khat thatlup khit ding gam sungah lai ki hawm khinta hi. Kongcing pa in Galkap mangpa mai-ah a kun noploh man bekbek in minam khat cimang ding hita hi. Kongcing pa in Topa mailo adang peuhmah bia kei inla kunkei in cihthu bulphuh hi.
Kong cingpa minam khempeuhin a ki thatlup khit ding uh hong zata uh hi. Na sem dingin a paite kap ziahziah, an huan dingte kap ziahziah, a munmun ah kong cingpa minampihte khempeuh kap ziahziah uhhi. A gam sung uh ah dahna khitui luangin vul mahmah uhhi. Kumpipa zi pen kong
cingpa minampih ban-ah a sanggampa tanu ahihi. Kumpipa kiangah a zi kha khat in khat vei bek pai khuan ahihi. Tua kha pen kumpipa kiangah a pai theih nawnloh kha hi sawnsawn hi.
Kumpi nu in kumpipa kiangah paileng a zi ka hih hangin thatlup a thuak ding ka hihi cihi. Kongcingpa in kumpinu kiangah hih ciang na tuna pen Pasian in deihna khat nei hi ding hi. Kumpipa kiangah na pai nop keileh pai kei-in ahi zongin kei mikhat khat in i minambup in thatlup thuak hileh nang zong na pengtuan kei ding hi. Ahi zongin Pasianin lampi khat hong honsak dinga thatna ka thuak kei ding uhhi cih kongcingpa in gen hi.
Kumpinu lungsim sukha mahmah ahih manin ka sihleh zong ka minamte adingin ka si zaw ding hi cihi. Sih leh sih kumpipa kiangah ka pai dinga hih thu ka gen ding hi cihi. Kumpinu in kongcingpa kiangah I minambup in nihthum sung An ne lo, tui dawnlo in Topa maipha zongin thungen ni. Tua khitteh ka pai ding hi cihi. A minambup un thu hong ngenin Pasian maipha hong zong masa ciat uhhi. Tua khit ciangin kumpinu zong kumpipa kiangah hong pai hi. A tomin genleng kumpinu in kumpipa kiangah a thuteng khempeuh a genma in Pasian maipha zong masa zaw uh ahih manin kumpipa tungah thu a genma in Pasian in amai a zongte na huhpah in that dingin a vaihawm mipa in thatlupna thuak in, that dingin a ki tangko pa in Pahtawina ngah hi.
Pasian maipha a zong minam ihih nang lunggulh huai hi. Kua maipha hiam i zonzon, i maipha zonten hong gumzo takpi mah hiam? Maipha a zon huai takpi mah hiam? Mipil mihau te maipha zong lua ki sa in i bia kha hiam? Lai Siangtho Esther sung ka simteh hong sukha mahmah hi. Minambup in Pasian maipha i zongzo kei zongin mimal kimin a zontaakzia ka phawk semsem hi. Lungdam.
Thawn Tuang
Nashville, TN USA
June 10,2015
Ka laigelh tengteng>>www.zomi-angvaan.
0 Comments
Nong simsak manin lungdam mahmah ing.