Lawm dingin Deihnawn ken!

Lawmta minih ki-it mahmah uh ahih manin khat Pa in lawm aw..i sih lehzong ki sihpih ngamni maw...ki taisan ngei kei ni maw...haksatna i tuah lehzong ki huhni maw cih kamciam bawl uhhi.

 

Khat vei gamsung/gamlak ah pai khawm uhhi. Up mawhlohpi-in Vompi khat in na um pah hi. Khatpa pen Sing tungah kahto manin Khatpa pen kahto manlo ahih manin Vompi inzong pha dekta ahih manin a lawmpa bukna Sing nuai-ah ki sih khem hi. Vompi inzong a si hiam? a hing lai hiam ci-in a bil kimteng namnam hi. Tua laitak in a lawmpa in Singkung tung panin en suk gige hi. Vompi inzong si mah ei ci-in nusia bilbel hi. Bang mah cihsamlo hi. A lawmpa zong Singtung panin kum suksuk in a lawmpa kiang hong tungta hi.

 

Lawm aw Vompi in na Bil panin hong hopihpih bang hong gen hiam? ci-in a dotleh a lawmpa in..lawm aw Vompi in hong hopihna ah na lawmpa pen lawm dingin deihnawn kei-in hong it taktak hileh hong nusialo ding hi hong ci hi cihthu alawmpa kiangah gen hi. A lawmpa inzong Vompi in hong petlum khaleh ci-in hong taisan mah kaive cihsan lel hi.

 

 

Mihingte ki sihpih ngam ding taktak tam hetlo ding hi. Nupa ki-it te, nungak tangval ki ngaite na lengzong a ki sihpih ngam taktak ding muhhak mahmah kha ding hi. Ahi zongin ki-itlo ki ngailo cih hi peuhmah lo hi. Ki nuntakpih ngam ki hizaw hi. Ki sihpih ngamna in phattuamna tampiaklo zaw aa, ki nuntaakpih ngamna pen thupi hi. Hau taleh zawng taleh pil taleh hai taleh nuntak khopna pen thupi mahmah hi. A nop sak laitak it cihte Zomiten i zatloh pen thupi mahmah hihang. Ih minam zong sihpih ngam ding taktak thupi masa lo aa, i omom na ah i nuntakpih ngam, gumngam in cilbawl loh ding ahihi Zomite ki ciamtehna zong Vaphual ki-itna hizaw hi.

 

 

Mihingte ki itzia tua dan hi-a Pasian zia ahihleh hong nuntakpih ngamin hong sihpih ngam hi. Mung neilo itna sang penpen tawh hong it den hi. Lawm dingin deih nawn ken cih kammal i zak hangin lawmding leh a it pen dingin hong samden Pasian bek mah om hi. Tagah lungneu, lawm dingin deihlohna, mite hong neu bawlna tampi thuakmah leng hang eitawh hong om khawmden Emanuel Pasian phawk denni. Lungdam.

 

 

Thawn Tuang
Nashville TN USA
June 12,2015
Ka laigelh tengteng>>www.zomi-angvaan.blogspot.com