Africa gam aom Lai bawlna lam Company khat in USA aom Laibawlna Setpi ( Engine ) a hoih mahmah a lian khat lei uh hi. Tua pen Tembawpi khat tawh pua uh hi. Tua Laibawlna Set van pawl khat pelh khia uh hi. Africa gam a tunzawh uhteh a Set teng hong lemlem uh hi. A zawh uhteh hong Start uhleh ngahzo mahmah lo uhhi. Set lam tawh kisai Africa aom a siamte asap uh hangin ngahzo tuanlo uhi. Bangbang leh USA gam aom te mah bawlsak ni ci-in hong sam uhi.
USA gam panin Africa gam ah tua Set lemtuah dingin mi khat pai hi. Africa gam a tunteh Laibawlna Set a leiten tua Set a lemtuah ding mipa amuh uhteh khangno sa lua mahmah uh ahih manin abawl thei dingin lam-en lo, umlo uhhi. Muangzo mahmahlo uhhi. Africa gam aom ten USA aom te kiangah hih Khangno nong pai sak un bang mah hih theilo ding hi, khangno mahmah lai hi ci-in a khangham deuh hong pai pih un ci hi.
USA aom ten tu-a kong paisak pa uh pen a khangno hangin hih Laibawlna Set tawh ki sai ama bawl ahihi. Ama'n a bawl thei keileh ko zong ka bawl thei kei ding uh hi cih zasak kik uhhi. Tu a khangno pa in Africa gam aom te muanloh lam a thei hangin paupih sese lo hi. Tuateh Khangno pa in Set vanteng hoihtak in hong lemtuah in hoih mahmah aa, Africa gam aom ten nuamtak in Laibawl hong ki pan theipah uhhi.
USA gam panin a pai khangno pa in Africa gam aomte kiangah a kamvai khak nunung penin bang hiam cihleh, mi khat peuh na muhbek un a mel leh sa tawh en in thu khen pah kei unla, pi bawl in neumuh pah kei un. Na kumte uh a tam hangin ko hunlai, no hunlai ci-in kamtam zangh sese dah lel un. Mi hingin hun neih kim hi. Nomau hun bek thupisak in, tu-a khangno te zong ngaihsutsak un. Ko hun cih khawng na tamzat uhleh khangno ten zadah lel hi. Thukhat peuhpeuh khinkhai unla mittaw sialkhau let nawn kei un ci-in vai khak hi. Lungdam.
Thawn Tuang
Nashville TN USA
Oct 30,2015
0 Comments
Nong simsak manin lungdam mahmah ing.