Lungdamdan Siamni

Ih lungdamna, i gual zawhna lamlam gen pen hoih hi. Ei lungdam, ei gualzo ihihleh a lungdamlo, a gualzolo te phinbawl leh gensiat tawh thuahsuk gawp cihte ki dawp huai mahmah hi. Mipilpa khat in, "Gensiatna, kona, mawhsakna cihte pen mi hai khempeuh in seem thei lel a, mi haite’ nasep hi zaw hi", cihi. Mihai hih ki ut samlo ahih manin mi gensialo ding hiziau hi.

Thugensiam Pastor Joel in, "Kam na pau ding ciangin ki dawm mahmah in. Second 10 sungin mite lungtang natna dingin ki pau kha thei aa, tua pen kum 10 sungin mailo in om tawntung thei hi", ci hi. Ih sung panin a pai khiat khat peuh tawm vei sung ahih hangin mite i buaisak khakteh kum tampi sungin mite lungtang natna piang thei hi.



An ih huanteh meiphat den lualeng kang gawp thei hi. I hi ciang khat in mei kuang sak litlit thei leng nek ding tampi hong piang sak thei veve hi. 

Ih hauhna, i lungdamna, i pilna te sauvei i khomnop leh gamtat kampau ki dawm ding cihthu hiziau hi. A gualzo na hihleh ka gual zawhna Topa hang bek hi icih thei aa, lungdam i koh ding thupi mahmah hi. A khengval in lungdamna zat val gawp ding hilo hi. Ni hong suak in, ni hong tum kik thei ahih lam phawk huai hi. Ni tang sungah na hoih tampi ki sem theihi. Tua i sep thei hun sungin mite phattuamna dingin kampau in na hoihsep zawh nang Pasian tungah Thala ni. Lungdam.

Thawn Tuang
Nashville TN USA
Nov 9,2015