Myra, Lysia, Asia Minor khua ah 14th century lai-in Saint Nicholas kici Bishop khat na om ngei hi. Zawn luat man a numei kizuak a suak ding nungaknote bishop pa in tankhia zel-a, biakinn ah keem in, mi hoih suah zeel hi. A liam a bai, a poi a hem naupangte khawng zong a muhmuhna panin ciahpih-a, biakinn ah khansuah in mi kizang thei a suahna dingin pantah hi.
Mizawng, daipaamte kiangah letsong khawng hawm zeel hi. Mi ahehpih thei piakkhiatna a hat bishop pa ahihi. Ama nungah ama nasepna thupi a sa pawlkhat in a nasep zomlai sam napi uh tawl khat khit ciangin beimang lel hi. 15th century ciangin Holland gam-a Dutch-te pawlpi khat in hih nasep hoih hong zom kik uh-a, Saint Nicholas pen amau kam (Dutch kam) in Sinterklass ci uhi. Dutch te pawlkhat America gamah lal uh-a, tulai-a New York City a kicihna mun tua hun lai-a New Amsterdam kici mun hong tung uhi. Saint Nicholas nasep hoih hong sem uh-a, a diakdiak in Christmas ciangin naupangte letsong hawm uhi. Dutch kam-a Sinterklass a cih pen uh, America-a om English kampaute in lo thei lian lo uh ahih manin “Santa Claus” ci-in America naupangte in letsong kihawm dingpen ngaklah mahmah uhi. Tua hi-a naupangte in letsong hawm-a pai pa pen “North pole-a om Christmas ciang-a naupangte letsong a hawm pa” ci uhi.
“Gamlapi a om puteek pa in letsong a hawmna” pen gamlapi-a om i Pasian in eite ading in leitung letsong, vantung letsong hong piakna kiphawk theihna ahih manin Santa Claus vai zong Laisiangtho thulaigil tawh kituak ngeina hoih khat ahihi.
Tu hunteh Bishop pa puansanpi bek thamloh a kang hita leh Vasa lim bang khawngin a hoihnono puanlim hong omta hi. Inn mai ah Santa Claus milim puansan tawh ki ding sak in, inn ki lawmsak tuam, lungdambawl etlawm tuamsak mahmah hi.
src: (Britinnica Ready Reference Encyclopedia 7:108)
Lungdambawl nopna Thupa akua mapeuh tungah hong tung hen.
Thawn Tuang
Nashville TN USA
Dec 24,2015
0 Comments
Nong simsak manin lungdam mahmah ing.