Sawltak Hoih, Na Sem Hoih

Hun khat lai-in Africa gam ah Khedap ki bulhlo hi. Gam dang aom Khedap Company ten a na semte khat Khedap Company bawlleng ahoih diam, Khedap zuakleng a ki khawng diam ci-in gam en dingin sawl uhhi. A sawl mipa in a etleh khedap ki bulhlo vive mu uh ahih manin hih minam ten Khedap bulhlo uh aa, ki samlo uhhi. Zuak lengzong hong leilo ding uhhi. Bulh theilo ding uhhi ci-in Company te kiangah a muhdan gen hi.





Tua zawh a sawt lo-in company dang khat pan mikhat hong tung leuleu hi.  “Hih munah kua mah in khedap nei lo hi. Tua ahih manin khedap tampi kikhawng ding hi,” ci-in a company te kiangah ama muhdan gen hi.

Mihing khat i lungsim puakzia ahihleh ki banglo hi. A hoihlam a mu thei mi om aa, hoihta leh a hoihlo in a mu om veve hi. Mipil ten a hoihlam a mu thei mite tawh ki khawl lecin ahoihlam na mu thei ding hi acih mah bangin i ki zoppih mi, i lawm ding mi thupi mahmah hi. 

Ama bek thu a sa mihingte makai ut phadeuh uh aa, itna neihten ki sawlta keileh na hoihsem hi kici hi. Sawl manin sepna pen thumanna hi aa, sawlloh in na hoih sepna pen Thupha bawlna ahihi. Tua ahih manin nisim nuntakna sungah a hoihlam a mu thei ding mihing hih ding kisin huai aa, sep khiat huai mahmah hi. Lungdam.

Thawn Tuang
Nashville TN USA