I maban ding bang hiam?

Naupang ki mawlna mun khat ah a Pate' ciat in a Tate ciat pai pih uhhi. A tate ki mawlna huang sungah a Pate' ki lutsak lo hi. Ahi zongin a Pate'n a Tate ki mawlna a ngei panin en ciat thei uhhi.

Naupangte zong ki mawl ngeingai in tuateh kam hong ki nial  khengkhang uhhi. Pawl khat in;

1. Kei ka Pa in USA kumpi pa thei,

2. Kei ka Pa in Leitunga mi haupa thei,

3. Kei ka pa in Vanleng bawl masa pa thei....cih bangin a Pate' theihna genin hong ki nial khengkhang uhhi. Tua a ki nialna uh pen a ngei panin a ngak a Pate' ciat in a Tate ki nialna za ciat uhhi.

Naupang khat penin, kei ka Pa in, " Zeisu in Pasian khat ahihi",  cih thei ci-in gen ziau hi. A ngei aa, Papi dang khat in tua aw' a zak ciangin, a Tapa genna tawh ki lehbulh lua mahmah ahih manin amaizum hi.

Inn a tung ciangin tua Papi pa in, " Topa aw ka ta ten a khantawn tungin Topa na hihna hong tel semsem leh ut lua ing",ci-in kap liangin Topa tungah thungen hi.

Tu hunteh thu dangdang Tate theihsak ding tampi om mah inteh amasa penpen in i biak Pasian a tel dinguh Thupi masa penpen hi. Tua lo tawh nisim i kalsuanna ah maban limcii Thupi zaw thudang omlo hi. Tu-in i maban ding bang hiam?

Lungdam Happy Fathers Day 2017

Thawn Tuang
Zomi Angvaan
June 18,2017