Hoih Zaw Lai....Zaw Sop

Zomi mintawh ki zopna, ki pawlna tampi om a, tuate sungah phawk huai leh zatloh huai pawl khat om ka sa hi. A zawdeuh in ki zopna groups mail te ah ki dawp huaisem hi. Bang hang? Hong thei ngeilo khat in i minbek, i laisuah bek tawh hong mu khilh thei a, hong tawisang thei uh hi. Kei muhna ah, " Hoih Zaw Lai ", cih tawh ki sai kong gelh suk nuam hi.

1. Mi tawh ki zopna tung tawn panin, ki min siatsak ding sang' ki zoploh mah, "Hoih Zaw Lai ", hi.

Ki zopna hangin minsiatna ki ngah zawsop thei hi.

2. Mi khat laitang natnang' thu i suah sang' suahloh mah, "Hoih Zaw Lai", hi.
I theih tel khempeuh genleng mite laitang natna suak thei zawsop hi.

3. Ki hopih a i ki tot liang sangin ki hopih loh, "Hoih Zaw Lai", hi.
Kam siam nopna zong mitawh ki totna piangsak thei zaw sop hi.

4. Mi khat peuh i pahtawi khilh sang' in pahtawiloh, "Hoih Zaw Lai", hi.
Mi vang neihlai vangtah suak sak zawsop thei hi.

5. Ki pawlna tampi om a, i ki lemloh sang' ki pawlna omlo ,"Hoih Zaw Lai", hi.
Ki pawlna cihpen ki pawl theih ut man hi na pi in, ki lemlohna ki patna suak thei zawsop hi.

6. Mi khat sum leh paai, tha leh ngal tawh huh huh a, a tawpna ah min i daisak sang' huhloh, "Hoih Zaw Lai", hi.
Min dailo pi ding, mindai suaksak zawsop thei hi.

7. Pasian phatphat a, i lungsim hoihlohna, guih thei khamthei i khel theihloh sang' phahloh mah, "Hoih Zaw Lai", hi.

Pasian a lungkim sak dinglai lungso sak zawsop thei hi.
8. Semsem a, ahoihloh sepsep sang' in seploh mah,"Hoih Zaw Lai", hi.
Na sepding ahoih tampi om na pi, i nasepsep mite nuntakna siatna a pia hi zawsop thei hi.

Thawn Tuang
Zomi Angvaan
22 Dec 2011